خودا هه‌ر تۆی که‌ریمی کردگاری
خودای مڵک و مه‌له‌ک، له‌یل و نه‌هاری

هه‌رچی زه‌ڕڕاتی عه‌رز و ئاسمانه
کوراتی به‌ر هه‌تاوی لانیساری

له‌ ژێری ڕووپه‌ڕی ده‌ور و زه‌مانی
به‌ هه‌ر نه‌خشێ ته‌ماشاکه‌م، دیاری

عه‌زیزی تۆ له‌ هه‌ر لا خۆشه‌ویسته
زه‌لیلی تۆ به‌ که‌س نایه قوتاری

گوڵستان و گوڵ و گوڵزار و گوڵشه‌ن
نه‌ی و شمشاد و سه‌روی جۆیباری

نه‌وا و ناڵه و گریانی قومری
فه‌غانی بولبولی سه‌ر شاخساری

زریوه‌ی مه‌ل له‌سه‌ر په‌ل یا له‌ سه‌ر گوڵ
چریکه‌ی هودهود و سه‌وتی هه‌زاری

سه‌ڵا و حه‌قحه‌قی مورغانی یاحه‌ق
که‌ ده‌نگیان دێ له‌ سه‌ر عوودی قوماری

هه‌موو تاریفی زاتی پاکی تۆیه
ده‌مێ ئه‌یکه‌ن به‌ خه‌نده و گا به‌ زاری

به‌ لووتکه‌ی شاخه‌وه و‌ نوچکه‌ی چیاوه
ئه‌خوێنن که‌بکی مه‌ستی کۆهساری

به‌ هه‌ر نه‌زم و به‌ هه‌ر وێنه و عیباره‌ت
هه‌موو ئیقرار ئه‌که‌ن په‌روه‌ردگاری

ئه‌زانی حاڵی زاری من چلۆنه
چیان لێ کردووم فه‌قر و نه‌داری

فه‌قیر و گێڕ و لاکه‌وته و نه‌خۆشم
به‌ بێ چاوی و به‌ پیری و ئیختیاری

به‌ ناز و ڕاز و ئیعجازی محه‌ممه‌د
به‌ ئه‌سحاب و به‌ ئال و چوار یاری

به‌ هاوارم بگه، گیانم زه‌لیله
به‌ غه‌یری تۆم نییه هومێدواری

ئه‌من «مه‌عروف»ه‌که‌ی تۆم و په‌شێوم
سه‌ری تێ کردووم پیری و هه‌ژاری