بازى دوورى وا بە تیرى غەم دڵى کردم نزار
قەت موعینێکم نییە عەرزم بەرێتە کۆیى یار

دەردى دوورى بەو تەبیبانە عیلاجى ناکرێ
زامی تەقدیری ئەزەل با داروویى لوقمان چ کار

ئاورى هیجران لە سینەم دابێ کفنم بۆ چییە؟
خۆى لەبەر ئەو ناڵە ناگرێ سەنگى تابووت و مەزار

ئەى ڕەفیقان عیللەتى دووریمە دەستم لێ مەدەن
قەت شیفاى نایێ برینم تا نەگاتە دەستى یار

تەوقى عەشقى ویم لە گەردندا، نەجاتیم بۆ نییە
کۆششى بێ‌فایدە یادى خەڵاسى و ڕەستگار

من گەدایى کۆیى یارم پادشاهیم کەى دەوێ
دەوڵەتى دونیا و قیامەت بۆچمە بێ چاوى یار

عالەمت بێزارە لێ (سافى) لەبەر زارى، بەسە
مەقسەدت تەفویز بکە بۆ خالقى پەروەردگار