سەد نامی خودا ڕوومەتی وەک ماھی تەمامە
لەو چاوە نەخۆشانە دەڵێ مەستی مودامە
ڕوخساری گوڵی نازک و دەم غونچەیی تەنگی
لەو زولف و خەت و خاڵە دەڵێی دانە و دامە
وا چاکە نەمامی قەدی تۆ تازە و تەر بێ
بینێژە لەسەر دیدەیی من جێگە نەمامە
لەوساوە کە تۆ ڕوومەت ئەشاریتەوە گیانە
مەجنوونی بیابانم و شەو شین و ھەرامە
بەو غەمزە دڵم کون کونە وەک خانەیی زەنبوور
بەو قەوسی برۆ ھەم جگەرت لەت لەت و زامە
سەد جا کە دڵم عاجز و بیمارە لە دووریت
یادت تەرەب و شەوچەرەس و بەزم و چرامە
ساقی بە فیداتم بدە ئینساف و مەیی ساف
دەرمانی دڵی خەستە بەڵێ بادە و جامە
موتریب وەرە تۆش ئەم غەزەلە تازە لەبەر کە
لوقمانی ھەموو دەرد و غەم و مەرھەمی زامە
حیفزی بکە یا ڕەببی لە چاوی حەسەد و بەد
ئەو دولبەرە قەد عەرعەرە ئەو کەبکی خەرامە
عەیبت نییە غەیرەز ئەمە بێ ڕەحم و وەفایی
بۆ شیمەیی تۆ چا نییە ئەم ڕەسم و نیزامە
تا ناوی خۆشت ویرد و دوعای سابیرە قوربان
دەرمانی ھەموو دەرد و غەم و مەرھەمی زامە