من لە نوێژا بوو کە دیم تاقی برۆت بەرچاوە
حاڵەتێ گرتمی میحرابەکە دەنگی داوە

لە من ئێستا بەتەمای سەبر و دڵ و هۆشێ مەبە
ئەو سروشتی کە ئەتۆ دیوتە ئیتر نەمماوە

مەلی باغ و چەمەنێ مەستن و بادەش ڕوونە
کاتی دڵدارییە ئاواتی دڵان بووژاوە

ڕوو بەرەو خۆشی دەبینم لەوە بەو لاوە جیهان
بۆنی خۆشی گوڵی هێنا کزە با لەو لاوە

وەرە ئەی بووکی هونەر بەس کە شکایەت لە بەخت
هۆدەیی جوانی بڕازێنەوە زاوا لاوە

خۆ دەڕازێننەوە بووکانی بەهاری گشتی
دڵبەری ئێمەیە، خۆ جوان و خوداپێداوە

داری بەر گشتی لە ژێر باری عەلاقەی دنیان
خۆشی بۆ سەروە کە ئازاد و لەخەم ڕەخساوە

لە وتەی حافزی شیعرێکی وەخوێنە موتریب
تا بڵێم باوە! نەشەی دەوری جوانیم ماوە