مەجنوون وەرە قوربانی سیفاتی حەسەنت بم! ^١
حەیرانی سەفای نەجد و وڵاتی یەمەنت بم!

کوژراوی بیابان‌گەڕیی و دەربەدریتم
شەیدایی هەموو چۆڵگه و دار و دەونت بم!

هەرجێگه گەیشتی، وەتەنت بوو له زەعیفی
قوربانی هەموو گەرد و غوباری وەتەنت بم!

چاوت بووه ئاوپاشی چەمەنزار و گوڵستان
شەیدایی گوڵستان و بیساتی چەمەنت بم!

هەر کەس نییە وەک تۆ بە خەتاچوو لە مەحەببەت^٢
قوربانی سمی ئاهوویی سەحرای خوتەنت بم!

مردوویی قسەی خۆشم و لەهجەی نمەکینت
ئاوبردەیی نوتقی خۆشی شەککەرشکەنت بم!

بۆ هاودەمی تۆ قابیله 'کامیل' به شەو و ڕۆژ
قوربانی ڕەش‌وڕووتی و زەعفی بەدەنت بم!