وا بەهار هات و بەڵام بولبولی دڵ بێ نەشەیە
خونچە پێناکەنێ، کۆرپەی نەتەوە بێ گەشەیە

کۆتر و قومری، قەل و داڵ، ڕێکی بە جەم چوونەوە ژوور
سارد و سەرمایە وڵات، چۆڵە؛ جیهان، بێ خشەیە

کەوی کێوی وەڕەزن، چونکە نەبوو شین کەژ وکۆ
پێی نەماوە گوڕە، بێ کەیفە، لە پاشەکشەیە

پیرەگامێش لە لەوەڕ کەوتووە، هەڵدێتەوە ژوور
موبتەلای دەردی گران و سەدەمەی خش خشەیە

هەرکەسێ خۆشە دڵی، کاکی 'ئیمامی' بە خودا، ‌‌
پاکی فێڵە و تەڵەکە، ڕێکی درۆیە و فشەیە! ‌‌‌