دووچاوی مەستتە کێشاویانە ناز لە یەک^١
عەجەب، نییانە دوو بەدمەست ئیحتیراز لەیەک!

کە خەوتی، تێک ئەڕژێ لەشکری موژەت تێکڕا،
هەڵێنە چاو و جیاکە سپاهی ناز لەیەک^٢

لە بەینی ئەبرۆ و چاوت بە موو دەکەن فەرقێ
بەڵا و فیتنە نیانەچ ئیمتیاز لە یەک! ^٣

کەسێ حیکایەتی زارت لەکن کەسێ ناڵێ
چ ڕەمز و نیکتەیە پۆشیویە ئەهلی ڕاز لەیەک؟ ^٤

دڵم کەوێکی کوڵێوە بە دەس دوو زوڵفی تۆ
پەرۆش و عاجز و قەڵسن دوو شاهباز لە یەک

ئەتۆ کە ماچی دوو لێوت دەوێ، 'ئیمامی'ش ڕۆح،
عەجایبە کە نەبووین ئێستە بێ نیاز لەیەک!