نازداری جافان، نازداری جافان
نازداری بێ‌عەیب تایەفەی جافان

پێش‌ڕەوەی پۆلی ئاسکی سەرشاخان
گوڵی سەرکردەی گوڵی ناو باخان

ئاسکی کەژاڵ، چاو لە دەشت و دەر
توند و سرک و گورج لە سێبەر سڵ‌کەر

لە تیرەی تەتار شۆخی شیرین‌خاڵ
خاوەن خەت و خاڵ خەتا و خوتەن ماڵ

جێگەت سازگار لە بەرزی کوێستان
ڕاوچیانت وێڵ دڵیان پڕلە ژان

ئەبرۆ وەک کەوان چالاک و چاوڕەش
لە دەست و تیرت ئەتکێ خوێنی گەش

گۆنە و لاجانگت هەتاوی قەدپاڵ
باڵندەی توندڕەو شمقاڕی تیژباڵ

چرای ڕووناکی هەموو ڕەش‌ماڵان
ناوت ویردی لێو خاوەن ئیقباڵان

بە کوڵمی گەشی پڕ لە نوورەوە...
کێت نەدابەدەم ئاگری سوورەوە؟

بەو برۆ ڕەشە تۆخ و قەترانە...
خانەی چەن دڵت کردە وێرانە

بەو چاوەگەشەی سورمە تێ‌کراوە...
موژەت لە خوێنی کێ وەرنەداوە؟

بەو نیونیگای ناز، بەو لەنجەولارە...
ئاخر جەرگی کێت نەکردووە پارە؟

بە ڕەوتی نەرم و لەنجەو هاتووچوو...
بڵێ کێت نەکرد بە باوک مردوو؟

بە گەردەنی بەرز شوشەتەزەوە...
بە پرچی لول و باڵای بەرزەوە...

توخوا دڵی کێت تۆ نەستاندەوە؟
خانەی ژیانت نەڕوخاندەوە؟

من لە داخی تۆ جەرگم بوو توێ‌توێ
هەر داخە دێتە سەر داخانی نوێ