١. «تێبينی»: لەم هەڵبەستەدا وا دەرئەكەوێ كه «صەيدی» ئەم هۆنراوانەی
بۆ «ميرزا» ناوێك ناردبێ. هەرچەند به تەواوی بۆم ڕوون نەبووەتەوه، بەڵام مومكينه بۆ باوكی يا باوای «ميرزا عبد القادر پاوەيی» ناردبێ. ميرزا «عبد القادر»ی پاوەييش شاعيرێكی هەورامی بووه له «پاوه» كه شارێكه له ناوچەی هەورامانی «لهۆن». ديوانەكەی نزيكەی ٧٠٠ شيعر ئەبوو، لام بوو مەلا «حەمه ظاهر» نووسيبووی بۆ شێخ «عوسمان»ی شێخ «علاء الدّين»ی ناردبوو، ئەويش لەگەڵ كتێبەكانما له ساڵی ٩٦٣ی زاينی له سلێمانی سووتا. (م. كاردۆخی)
«ئاگاداری»: له رۆژنامەی «ژين»ی ژماره ١٣١١ی ڕۆژی ٦/٩/٩٥٦ی زاينی هۆنراوەيەكی شاعيری پايەبەرزی هەورامی «ميرزا شەفيع» بڵاو كرابووەوه، وه نووسرابوو ميرزا شەفيع له ساڵی ١١٨٤ی كۆچی له دايك بووه. بەما بۆم دەركەوت كه «صەيدی» پانزه ساڵ لەو بچوكتره. وه بۆم ڕوون بووەوه كه مەبەسی «صەيدی» له «ميرزام» «ميرزا شەفيع»ی شاعيری هەورامی‏يه كه له شاری «پاوه» دانيشتووه. م. كاردۆخی
٢. كۆساڵان: ناوی شاخێكی زۆر گەورەو بەرزه له ناوچەی هەورامان.
وەشەن: خۆشه. واته: كۆساڵان خۆشه، كۆساڵان خۆشه، ميرزام سەيری شاخی «كۆساڵان» خۆشه.
٣. واته: تەماشای جەرگەی گۆڵاڵان خۆشه، سەيری بەرزايی عەوداڵان خۆشه.
٤. پەی: بۆ. لانسار: لانزار، شوێنێ كه سێبەری زۆر بێو خۆرەتاوی كەم.
وەرواوش: بەفراوی. واته: لانزاری خاڵ خاڵی بەفری، بەفراوی له شيرين تا تاڵی لاپاڵی هەموويان جوان‏و خۆشن.
٥. واته: شنەی سەر شاخان‏و قەراخ ئاوی زۆری شەتاوی زۆر خۆشه، بيداری ڕۆژانی‏و خەوی شەوانی زۆر خۆشه.
٦. واته: تەماشای نەورۆزو خاڵی ڕەشی بەينی بەفرانی خۆشه،
سپی‏يەتی، شينايی، ڕەشايی كۆساڵان هەموويان خۆشه.
تەماشای نەورۆز: مەبەستی له ڕۆژی تازەيه، بەيانيان زوو كه ڕۆژ ئەبێتەوه، يا مەبەستی گوڵه نەورۆزه.
٧. چۆپی: هەڵپەڕكێ. سەدای: دەنگی. وەشەن: خۆشه. واته: هەڵپەڕكێی
كۆساڵان‏و سەيرانی خۆشه، دەنگی قاقبه قاقبی كەوانی خۆشه.
٨. واته: چ جێگه گەشتێكی خۆشه بەسەريا تێپەڕی، چەند خۆشه بۆی
عەترو عەبيرو چنووری كۆساڵان.
٩. شەوبۆ: ناوی گوڵێكه له كوێستانەكانا به زۆری ئەڕوێ،
به شەوا بۆنی خۆشه. ئەشەد بۆ: ناوی گوڵێكی تری بۆن خۆشی
كوێستانەكانی كوردستانه، به گيای «ئەداو بابه» بەناوبانگه. واته: بۆی شەوبۆو ئەشەد بۆی كۆساڵان خۆشه، تەختايی‏و سارايی‏و دەرو دەشت‏و كەژو كێوی كۆساڵان هەمووی خۆشه.
١٠. واته: خۆشه بۆنی گوڵ سۆسەنی لووتكه بەرزەكانی، سەوزايی‏و
فەرشی بەردەمی داوێنی شاخەكانی خۆشه.
١١. واته: خۆشه خرپەی پێی پۆلی جوانانی، خەوی شيرينی شوێنه
سێبەرەكانی خۆشه.
١٢. وەشەن: خۆشه. ڕۆ: ڕۆژ. گێڵيش پيدا: پيا بگەڕێی. واته: خۆشه به ڕۆژالەگەڵ يارا پيا بگەرێيت، خۆشه ببيت به هاوڕازی شەوانی له جێگەدا. يانێ:
شەو تيا بمێنيتەوەو لەوێ بخەوی
١٣. واته: خۆشه كۆساڵان، وەك بەهەشته، ڕووی زەوی‏و زاری، خۆش‏و
شيرينه شادی‏و نيشاتی، كه بەو هەواو ديمەنه گورج‏و گۆڵ ئەبيتەوه.
١٤. واته: خۆشه، زۆر خۆشه سەيری بەهاری فەسڵی نيسانی، مانگی
ئەياری. وا دياره «صەيدی» ناوی مانگه ئينگليزيەكانيشی زانيوه
١٥. واته: بۆ كەسێ چاكه ميرزام كۆساڵان، مەبەسی له ميرزا شەفيعه
لەگەڵ يارەكەيا سەيری گوڵاڵه ی بەهار بكات.
١٦. واته: هەركەس وەك «صەيدی» له دووری يارا خەستەو دەردەداره! ،
كەی ئاواتی خواستوه بۆ سەيرو سەيرانی كۆساڵان؟ ! .