مەڵێن يا شێتە يا مەستی شەڕاب و ئارەق و بەنگە
خەيا‌ڵاتم پەرێشانە، دڵم تاريكە هەم تەنگە

مەكەن مەنعم، لە هەوری بيری من بارانی خوێن بڕژێ
لە سەحرای سينەدا ديسان، هەرايە، شۆڕشە، جەنگە

شەهی ئيقليمی بەدبەختی، لەبۆ تەسخيری موڵكی دڵ
هوجومی كردووە، تاليب بە تاج و تەخت و ئەوڕەنگە

ئەميری لەشكری زوڵمە، لە دەوری فەوجی بێ ڕەحمی
جەفا وو جەور و ميحنەت، ياوەر و سەر‌تيپ و سەرهەنگە

كەديتم لەشكری موڵكی بەدەن، مەغڵووب و مەحسوورە
بە فەرزينی غەمم، شاهی وجوودمه‌ مات و بێدەنگە

ڕووخی نەحو و پيادەی سەرف ‌و ئەسپی حيكمەت و مەنتيق
لە ژێر پێی فيلی سەنعەتدا‌، خەریكی وردە ئاهەنگە

کوتم: ئەی نەفسی غافڵ، هەستە سەيری وەزعی دنيا كە
بە نووری مەعريفەت ڕووی سەرزەمين، يەكسەر تەڵاڕەنگە

نەتيجەی حاسڵی دنيا و دينت جەهل و غەفڵەت بوو
تەواوی قەول و فيعلت، شەعبەدە و تەزوير و نەيڕەنگە

چ نەفعێکی هەیە بۆ تۆ، بزانی كەوكەبی تاليع
كە عەينوسسەورە، كلكی عەقرەبە، يا چەنگی خەرچەنگە

مەعاريف عيلمی تەييارە و گڕامافۆن و بێسيمە
ئەوەی تۆ پێی دەڵێی عيلم و مەعاريف‌، چاوەكەم نەنگە

مەسافەی بەينی عيلمت، تا دەگاتە عيلمی ئاديسون
عەزيزی من، بە ميليون و بە كيلومتر و فەرسەنگە

وەكيل و نايب و سەرجوخە بۆ تۆ شاهـ و سوڵتانن
ئەويش كەمتر غوڵامی خوسرەو و جەمشيد و هووشه‌‌نگە

بەڵێ، عالیم دەبێ يا ئيبنوسينا يا غەزالی بێ
کە ئيحيای ئەم شيفای قەلب و شفای ئەو كەنزی فەرهەنگە

حەياتی جاويدانی سەنعەت و سەربەرزييە جانا
قەتار و قافڵەی بێ عيلم و سەنعەت، تا ئەبەد لەنگە

چيیە؟ سا بەسیە «شاعير»، مەوعيزە و شيعر و غەزەلخانی
مەتاعی تۆ، هەموو بێ قيمەت و بێ ڕەونەق و ڕەنگە

كە شيعرت وەک سەدەف فەڕزەن هەموو پڕ بن لە دانەی دوڕ
لە لای ئەشخاسی ويشک و بێ تەبيعەت، ئاسن و سەنگە

كە مەقبووڵی جەنابی شێخ و ئەربابی تەبيعەت بێ
نیگارینخانه‌یی نه‌ققاشی چین و نه‌قشی ئه‌رژه‌نگه