شاکه‌:

به‌رزه‌ چناران، به‌رزه‌ چناران
به‌و بچیمه‌ سه‌ێر به‌رزه‌ چناران

چناره‌ێ خه‌ریو نزیک وه‌ شاران
جاگه‌ێ هه‌ر ساڵه‌ێ ته‌مه‌نگاێ یاران

گه‌ل گه‌ل و جوز جوز چۆ سپاداران
پرسام ئه‌ێ چنار غه‌ریب شاران

جاگه‌ێ عه‌ێش و نووش گوزه‌رگاێ یاران
ته‌مه‌نگاێ گوڵان سه‌وزه‌ێ وه‌هاران

پرسام ئه‌ێ چنار! شه‌م شه‌ماڵ له‌رز
تو له‌ هه‌واێ کی ئه‌ێقه‌ بۆده‌ به‌رز

پرسام ئه‌ێ چنار په‌ێ کی زه‌رده‌نی
مه‌ر چۆ من هێجران شه‌خسێ که‌رده‌نی؟

ئه‌وسا تۆلێ بۆم که‌فتم له‌ داران
سه‌ۆز کردم له‌ به‌ێن شیس مه‌غاران

گه‌ل گه‌ل نازاران هاتن وه‌ پاگه‌م
ته‌مه‌نگا کردن هه‌ر سوو له‌ ساگه‌م

قیقه‌ێ نازاران مه‌نیشت ئه‌و شاخم
منیش له‌و بووته‌وبه‌رز بۆ ده‌ماخم

قیقه‌ێ نازاران له‌ پاێ من وێه‌رد
منیش له‌و بووته‌و زایف بٶم و زه‌رد

له‌ به‌س ته‌مه‌نگاێ زنج و خاڵ که‌ردم
یه‌سه‌ له‌و بووته‌و زه‌عیف و زه‌ردم

شاکه‌:

هه‌ر ساڵێ ساتێ، هه‌ر رووژێ وه‌ختێ
ئمڕوو ڕاگه‌م که‌فت ئه‌و پاێ دره‌ختێ

واتم ئه‌ێ دره‌خت په‌ێ چی زه‌رده‌نی
مه‌ر چۆ من هێجران شه‌خسێ که‌رده‌نی

وه‌ت: لێوه‌ێ بێ عه‌قڵ حاڵ مه‌زان ده‌رد
دره‌خت بێ ده‌رد چته‌ور مه‌یو زه‌رد

ئه‌وقه‌ر ته‌مه‌نگاێ زنج و خاڵ کردم
هه‌ له‌و بووته‌وه‌ زه‌عیف و زه‌ردم

گه‌ل گه‌ل نازاران هاتن وه‌ پاگه‌م
فه‌رش ناز خسن نیشن له‌ ساگه‌م

چۆ دار ئاسوو ریشه‌ خوریاگم
وێنه‌ێ هه‌زره‌چی جواو دریاگم

ئیرنگه‌ چۆ سه‌ر سه‌وز شاهین پووس که‌نه‌
په‌ڕ و پووم له‌ ده‌ور گڵاڵه‌ێل مه‌نه‌