خ)شاکه‌ له‌ سه‌ر دا، شاکه‌ له‌ سه‌ر دا
راس باچه‌ په‌رێم ئمجا له‌ سه‌ر دا

شاکه‌ تن ئه‌و شا ده‌س له‌ خه‌ێبه‌ر دا
کی گڕه‌ێ ئاگر له‌ جه‌سه‌د وه‌ر دا؟

ش)خان له‌ مابه‌ێن خوڕان و بازان
جاگه‌ێ عه‌ێش و نووش که‌مه‌ن درازان

گه‌لێ کوورپه‌ دۆێه‌ت درات له‌ ماڵان
هێمان هانه‌ سن هه‌ێشت و نوو ساڵان

وه‌ لێوه‌ خه‌نه‌، وه‌ تیره‌ نازان
داخڵ بٶن له‌ ئاو سه‌راو بازان

له‌ جه‌ڵد درامان، قۆته‌ بۆن له‌ ئاو
وه‌ په‌نجه‌ێ شه‌مشاڵ یه‌ک مێان قه‌شاو

له‌ جه‌ڵد درامان، قۆته‌ بۆن له‌ هه‌وز
ڕۆ هه‌وز پووشانن چۆتاڵه‌ێ سه‌رسه‌وز

له‌ وێنه‌ێ سه‌رسه‌وز مه‌دان ئه‌و رۆ تاف
دان وه‌ تافه‌ێلا زوڵف که‌ڵاف که‌ڵاف

شستوشوو کردن چۆ غازێ وه‌ ناز
گاگا قیقه‌ێ چه‌رخ و گاگا بریقه‌ێ باز

له‌ ئاو درامان جه‌لا دان سه‌روه‌ن
تیپ دان چۆ که‌ڵ ره‌م دیار ده‌روه‌ن

له‌ ئاو درامان خاڵ وه‌ رێشته‌وه‌
خان مه‌سۆر نه‌یدان وه‌ مانێشته‌وه‌؟

ئه‌وه‌ڵ حه‌نیفه‌، گوڵ جه‌مالشه‌ن
ئاڵه‌م هه‌زره‌ت مه‌ن زنج و خاڵشه‌ن

دوێم جه‌واه‌ێر، ته‌مام بێ عێوه‌
رشته‌ێ ڕه‌نگاێ ڕه‌نگ کارخانه‌ێ خه‌ێوه‌

سه‌ێم ته‌مامه‌، ته‌مام ته‌مامه‌
گیسوو چۆ که‌مه‌ن وێنه‌ێ به‌هرامه‌

چوارم خه‌ێریه‌، خه‌ێرێ وه‌ باره‌
بوو ده‌رۆنه‌گه‌ێ مشک عه‌تاره‌

په‌نجم فاتمه‌، گیس چۆ به‌ره‌زا
وێنه‌ێ خوه‌ر زه‌رد له‌ رۆ که‌مه‌ر دا

شه‌شم ئاسیه‌، خاڵ چۆ ئاساره‌
ئه‌و خاڵه‌ له‌ رۆ زنجه‌ دیاره‌

هه‌فتم زینه‌ته‌، به‌رزه‌ چۆ چنار
نیش بژانگێ چۆ تیر مه‌که‌ێ کار

هه‌ێشتم گوڵ خه‌نان دۆێه‌ت سه‌یه‌مه‌ێ
ده‌م وێنه‌ێ جێران باڵا وێنه‌ێ نه‌ێ

نووه‌م نووریه‌، نۆر په‌ێدا که‌رده‌
مه‌ر مه‌فتۆڵ له‌ده‌ور مینا ڵۆڵ خوه‌رده‌

ده‌هم نسره‌ته‌، هۆڵ و سۆه‌ر هه‌مس
گل مه‌خوه‌ێ له‌ بان خورشێ ئاوه‌نوس

یانزه‌هم فه‌رده‌وس، تفڵ ته‌ڕ داروو
هه‌واێ گوڵ غومچه‌ێ لێو به‌ر داروو

دووانزه‌هم خورشێ با ئوومه‌ت گێشته‌
له‌و وه‌فراو خوه‌رێل قوله‌ێ مانێشته‌

سێنزه‌هم فانووس وه‌و ره‌فتاره‌وه‌
وه‌و خزم و خنج و له‌نجه‌ و لاره‌وه‌

خان مه‌سۆر:

شاکه‌ خاڵ له‌ێل وه‌ هه‌ێ هه‌ێ نیه‌ن
یان وه‌ نیمه‌شه‌و رٶ دوجه‌ێل نیه‌ن