خودا به‌ێ وه‌ پێد هه‌ر رووژ مینگه‌ێ نوو
قاڕه‌ێ کوورپه‌ وه‌رک، شاقه‌ێ که‌و له‌ کوو

خودا به‌ێ وه‌ پێد بێتره‌ له‌ گێشت
ئاوه‌گه‌ێ سیه‌چڵ، سه‌ردی پای مانێشت

مانێشت وه‌ فه‌داێ به‌رزی هه‌وادم
قیقه‌ێ نازاران هه‌ر سوو له‌ پادم

خودا به‌ێ وه‌ پێد له‌ ئاڵه‌م ئه‌و ده‌ر
مینگه‌ێ بان سه‌راو، کیه‌نی زه‌ر که‌مه‌ر

خوه‌شاڵ وه‌ خوه‌دان، خوه‌ش وه‌ حاڵتان
سه‌وزه‌ وه‌ بێ خه‌وف تیاێگه‌ ماڵتان

ڕه‌نجه‌روو و وێمه‌، که‌فتگه‌ کووسم
چگمه‌و شوون میرکان، بار کردێه‌ دووسم

ئمشه‌و له‌ به‌ختم مانگ ئاخڵ داگه‌
سه‌وزه‌ێ باڵابه‌رز قه‌ڕاوڵ ناگه‌

ته‌مه‌ناێ سه‌رچیت دووژ ده‌واران
ماچ کوورپه‌ دۆێه‌ت مینگه‌ نه‌واران
چٶبازێ گل ده‌ێ له شوون شکار

له ماڵ هاته‌و ده‌ر تووپی گوڵ ده‌مه‌
سه‌روه‌ن سه‌نگه‌ڵا ئه‌ێ پیاڵه‌ چه‌مه‌

له‌ ماڵ هاته‌و ده‌ر سه‌روه‌ن قه‌ڵاخی
چه‌وێل چۆ پیاڵه‌، ده‌م چۆ گوڵ باخی

له‌ ماڵ هاته‌و ده‌ر وه‌ ئسم بازی
هوونه‌ێل ها بان کوڵه‌نجه‌ێ شیرازی

زوڵف له‌ولاوی بپێچم له‌ ده‌س
بوومه‌ نه‌رده‌وان دو لیموو نه‌وره‌س

گه‌رمه‌سێر گه‌رمه‌ نیشتن به‌تاڵه‌
مانێشت کوو خاسه‌ وه‌فرێ خاڵ خاڵه‌

قه‌ومه‌ێل، براگه‌ێل، چه‌نی چه‌ن وه‌خته‌
شکار دڵم زامدار به‌خته‌

بازێگم ده‌رچگ وه‌ ته‌نافه‌وه‌
سه‌یاده‌ێل نیه‌ن وه‌ نشاته‌وه‌

چه‌رخه‌ێ چه‌و شرین شووخ دیده‌ مه‌س
ساێ سه‌ر ئه‌و بان که‌، بزان ئه‌رزم چوه‌س

سیاماڵ خاسه‌ خودا به‌ێ وه‌ پێت
ساێ دار ئیڵاخ و دڵ خوه‌شی پاێ چیت

بنیشی له‌ ساێ دیواخان وێت
رووژه‌ سه‌د هاوکوڕ سه‌ڵام که‌ێ وه‌ پێت