چاوم تاریکە، دڵم بێخولیا
لێم گەڕێن بۆ خۆم تەنیا بم، تەنیا
وەکوو بیرێکی فەرامۆشکراو
کە یەک پشکەئاو نەبێ لە بنیا.

نیشتمانی من شانیشتمان بوو،
ئاخ، سەدەی پیتڕۆڵ
ئاخ، گاز و کیمیا!
ئاخ چییان لێ کرد:
تەرەسی عۆجە و
گای بنەی خۆیی و
گەوادی دنیا!

ترووسکەگڕێک هێشتا هەر ماوە
لە ئاگردانی گیانی پڕ بریا...
هەر فووی لێ دەکەم،
بەڵکوو ڕۆژێک بێ
بەربێتە سەدەی گێبڵز و بێریا!

وا تەپەی پێ دێ،
گوێ هەڵخە، دڵە
ئەی بزنەکێویی چاوماری وریا!

کێیە؟ ـــ کوردستان!
توونی گەرماوی
مافی مرۆڤ و پڕۆلیتاریا

وەرە ژوورەوە!
ئەی ئەو چاوانەی
لەگەڵ گریانیان کەسێک نەگریا؛
ئەی ئەو ماسییەی دەریاش ڕاوکەرتە،
ئەی ئایەتەکەی لە قورئان ڕەمیا؛
وەرە ژوورەوە،
خۆشەویستەکەم!
وەرە بن باڵم، بنوو دڵنیا
ئەوەی دەیدوورم یەکێ لە دووانە:
'کفن یا ئاڵای ترۆپکی چیا'