ئەی گوایه بۆ دڵخۆش نەبین؟
ئەی گوایە بۆ هەڵنەپەڕین؟
چیمان کەمە؟ !
وا کەشتیمان ڕوو لە کەنار،
پشت لە بایە،
خێروبێری کۆمپانیای خوێن
شەپۆل داوێ، بنی نایە،
سەرمان بەرزە وەک ئاڵامان
هاوڕێی هەور و لووتکە چیایه!

ئەی گوایە بۆ دڵخۆش نەبین؟
ئەی گوایە بۆ هەڵنەپەڕین؟
چیمان کەمە؟ !
شەلین؟ کۆرین؟ لاڵین؟ کەڕین؟
چیمان کەمە؟ !

کەی بۆ کەزی و بسکی دایکان
وەکوو ئێستا، هەش زۆر بووە؟
کەی لە سایەی
تەیمانی هێسک و پرووسکا
گوڵی ئاوا گەش زۆر بووە؟

کەی گۆڕستان وا بە هەڕمێن و پڕ بووە؟
کوانێ، لە کوێ
بێدەنگی وا جاڕدراوە و
مناڵیشی پێ کڕ بووە؟ !

ئەی گوایە بۆ دڵخۆش نەبین؟
ئەی گوایە بۆ هەڵنەپەڕین؟
سەرفرازین
وەک ڕانەمەڕ
لەناو گەلەگورگی چاوتەنگا
تێرین وەکوو وردەماسی
لەناو هەناوی نەهەنگا!

ئەی گوایە بۆ دڵخۆش نەبین؟
ئەی گوایە بۆ هەڵنەپەڕین؟
شوانی گورگزادە خۆش بن
ئازادترین ڕانەمەڕین!