[مارگرێت، کچە پێشمەرگەی ئاسووری و پاڵەوانی ئەفسانەیی شۆڕشی ئەیلوولە]

ڕەنگی وشە
لە چی بکا، چاکە بۆ تۆ.
لە ئەرخەوان؟
لە پەلکەزێڕینەی حەفتڕەنگ؟
لە وەنەوشە، یا لە هێرۆ؟

ئەی بۆنەکەی
لە چی بکا، چاکە بۆ تۆ.
لە دووکەڵی پاش بۆردومان، یا گوڵەباخ؟
لە خاک و خۆڵ، یا لە شەوبۆ؟

دەنگی وشە
لە چی بکا، چاکە بۆ تۆ.
لە سرتەی ژوان، یا هاژەی چەم؟
لە بالۆرەی مازووچنان،
یا شەقژنی باڵی هەڵۆ؟

هەموو جارێ،
کە دەمەوێ
هەڵبەستێک بنووسم بۆ تۆ
قەڵەمەکەم چاو شۆڕ دەکا،
وەک ئەو سمێڵبابڕانەی
سەنگەریان لێت کردە گڵکۆ.

دەحەپەسێم،
لێم دەشێوێ
نازانم، بۆ هۆنراوەکەم
چبکەم بە دەنگ؟
چبکەم بە ڕەنگ؟
چبکەم بە بۆ؟
ئەی ئەو خاچەی لە خاچ درای،
شێرەژنی خاوەنشکۆ؟