شیعری نهێنی، عەبدوڵڵا پەشێو

خانمۆڵەکەم!
دە پێم بڵێ:
لەکوێ فێر بووی،
هۆنراوە بکەیتە پەخشان؟
لەکوێ فێر بووی،
دەریای یاخی
ئارام بکەی وەکوو ئاسمان؟

خۆ تۆ شلکەنەمامێکی^١، گیانی گیانان،
چۆن دەتوانی
سندم^٢ لە پێی گڕکان^٣ بکەی،
لغاو^٤ بکەی دەمی زریان؟

چۆن بە ساتێک
ئاوا ژینم دەڕەنگێنی،
بە ساتێکیش
بەستەڵەکی تیا دەکەیتە سەرچۆپیکێش؟
چۆن بە ساتێک
وەکوو ئاگر هەڵمدەکەی،
بە ساتێکیش ئاوا دەمکەی بە خۆڵەمێش؟ ...

١. شلک: ناسک، نەرموشل
٢. سند: پێوەندی ئاسن
٣. گڕکان: بورکان، ئاگرپژێن، ئاگری
٤. لغاو: جڵەوگرتن