(١)
بەس تەماشای ناولەپم کە!
خۆ من نامەوێ پێم بڵێی،
دەبم بە باوکی چەند مناڵ،
زەنگین دەبم، یا هەروا لات...
تەنیا شتێکم پێ بڵێ:
هەتا ماوم وەک تۆ دەژیم،
یاخۆ دەبمە خاوەن وڵات؟ !

(٢)
ئاسمانی تۆ بەرپێی خۆتە.
سەرت شۆڕکە،
ملت کەچ کە،
چاو مەگێڕە
بۆ ئاسمان و ئەستێرە و خوا
ئەوەی بستێک خاکی نەبێ،
خوا و ئەستێرە و ئاسمانی کوا؟ !

(٣)
مەراق مەخۆ،
سەغڵەت^١ مەبە، من بۆ تۆمە.
بەری دەستم کەس تێی ناگا
نهێنییەکەی هەر لای خۆمە.
ناولەپ^٢ نییە!
نەخشەیەکی پڕ نەوال^٣ وچیا و چۆمە!