ئەی نێرەهەڵۆی ڕەوەزان^١،
ئەی کەڵەکێوییەکەی باکوور،
ئەی سێدارەی بەژن^٢ بڵند،
ئەی نیشانەی مەرگی سنوور،

بێدەنگ مەبە، بچریکێنە.
ئاسمانی بە تریاک نوستوو ڕاچڵەکێنە
بێدەنگ مەبە،
دەنگت: ئەلبۆمی دەنگانە
دەنگت: پەلکەزێڕینەیە،
جێی زەماوەندی ڕەنگانە.

دەنگت:
سروەی^٣ بایە، سرتەی^٤ ژوانە،
بوومەلەرزەیە، بورکانە.

دەنگت:
نێسکەنێسکی^٥ هەسپێکی خورتی^٦ کەوێتە،
نێڵەنێڵی^٧ ئاگردانی قەرەجانە.

دەنگت:
ترپەترپی بە ئاستەمی خوناوکەیە،
گرمەی هەورە، ڕەمبەی هەرەسی شاخانە.

دەنگت:
کەروێشکەی گەنمی قەراجە،
هاڕە و نەعرەی
پڵنگێکی برینداری دوورەلانە.
********

بێدەنگ مەبە، دەنگت باڵی سیمرخێکە،
هەموو ڕۆژێک، دڵی تەنگم بەسەر دوندی^٨ چیا دەخا.
لە بەرپێمدا، پێدەشتی ئومێد ڕادەخا

بێدەنگ مەبە، کە دێمە سەر لووتکەی دەنگت؛
کە هەردوو پێم دەچەسپێنم
لەسەر زنارێکی^٩ ئەوێ،
نە ڕەشەبا دەمبزوێنێ، نە کڕێوە و تۆفی شەوێ.
ماڵنووستنان
هەردوو باڵم دەکەمەوە
لە چوارلاوە، زام بانگ دەکەم
بێ، بسرەوێ...
گوێم لە هەناسەی تەم دەبێ، تیشکی ڕۆژم پێ دەکەوێ!

ئەی کەڵەکێوییەکەی باکوور!
بێدەنگ مەبە، بچریکێنە
ئاسمانی بە تریاک نوستوو ڕاچڵەکێنە!
کە دێمە سەر لووتکەی دەنگت
هەر پەڵەهەورێک لەبەر کەم،
زرێیەکی پر بە بەرە؛

هەر گزنگێک ڕمی^١٠ دەستە
هەر دەوەنێک بۆم سوپەرە
هەر زنارێک ئەسپی شێیە
وەک برووسکە لەسەر پێیە،
لە نیشتمانی لەتەلەتما
دارێک بدزن
بەردێک بدزن
جێم بڵندە و ئاگام لێیە... !