کرێکارین، کرێکارین
پەروەردەی ئێش و ئازارین
ئارەقڕێژین،
ژین دەنێژین
تاکوو بژین.

کرێکارین، کرێکارین
کۆڵەکەی ژینین، بەکارین
بە هەڵمەتی بازوو و شانمان،
بە تەمەنی پڕ مەینەتی تێکۆشانمان
شاخوداخی پڕ مەترسی
بنکۆڵ^١ دەکەین، جەرگ دەدڕین،
لە کیسەی تەمەنی خۆمان
نرخێکی تازەی بۆ دەکڕین...

بەڵام تووشی سەرسوڕمانین
کە نازانین،
بۆ کێ دەچێ ڕەنجی بازوو
جگە لە نان، چەند لەتێک نان
-ماکی ژیان-
ئەمەش بۆچی؟

تا بێینە گەڕ وەکوو ئامراز،
بێ قڕەقڕ، نەمانبێ ڕاز
جگە لە ڕەنج، جگە لە کار،
بۆ گیرفانی سەرمایەدار!