تۆ ھێندە پەرتی،
بەمن و دونیا و ئەو گەردوونەدا
پڕژاوی وەک مەی،
مەراقمە جارێک بەرجەستەت بکەم،
بتبینم وەک ھەی!
***

لە تاریکیدا باشتر دەبینم!
لە تاریکیدا
باشتر مەتەڵ و مامک ھەڵدێنم،
تۆش وەک شاپەڕی ئەستێرەکانی،
قەت بێ تاریکی
تیشکت ناگاتە ڕیشە و لکوپۆم.
بۆیە، کە ئەمشەو
دێیتە بن کەپری ڕەشەڕێحانم،
با ھیچ نەسووتێ:
نە چرا، نە مۆم!
دەمەوێ ھەمووت ھەڵبوەشێنمەوە،
شانە بە شانە،
ئەتۆم بە ئەتۆم،
لە جەستەیەکدا داتبڕێژمەوە،
مشتوماڵت کەم بە ئارەزووی خۆم!