١٨٢
پادشا ڕووکەرد نە ئەعیان و ئەمیر
نمەز چېش کەروون بکەران تەدبیر

١٨٣
یە چە حاڵېوەن یاوان و ئەمیر
عېلاجش چېشەن واچن بۍ تەقسیر

١٨٤
بزورگان ئامان یەکسەر بە گوفتار
ئاخرئەلئەنجام ئامان بە ئەخبار

١٨٥
یەکێ وات ئەڵبەت یە کار دۑوەن
دېوان هەمیشە کارشان ڕېوەن

١٨٦
یەکێ وات جنوون ئەسەر دان نە ڕاش
یەکێ وات سەودان نەمەکەرۊ فاش

١٨٧
یەکێ وات سەفراش ئەغڵەبە کەردەن
جەو بۊنە جە خواب خورده‌ن ویەردەن

١٨٨
هەر کەس بە ڕەنگێ ئامان نە گفتار
مەتبووع تەبعش نەبۍ شەهریار

١٨٩
وات ئەی حەکیمان نادرەی ساڵان
جەی کارە پېم دەن یەکسەر ئەحواڵان

١٩٠
حەکیمان ئامان یەکسەر بە گوفتار
عەرزکەردن وە شاهـ کای واڵا تەبار

١٩١
سوپای عەشق نهان جە سەر جەم کەردەن
جەو بۊنە ڕاحەت ئارامش بەردەن

١٩٢
هەر عېشقەن خۆراک، خواب حەرام کەرۊ
عېشقەن یانەی فام و تاراج دەرۊ

١٩٣
پاشا با وەزیر ئەمیران پېش
شی ولای فه‌رزەند نوور دیدەی وېش

١٩٤
واتش ئەی فەرزەند نوور چەمانم
مایەی حەیاتم ڕۊح ڕەوانم

١٩٥
یە چە سەودانان یاوانت وە سەر
په‌نه‌م واچە ڕاست خەبەر سەرانسەر

١٩٦
گرەوا ئەمیر پەی یار مۆنس
نەوحەش بوڵەند کەرد نە جەمع مەجلس

١٩٧
واتش ئەی پدەر تاج سەر من
غارەت شی وە بەخت بەدئەختەر من

١٩٨
دەردم کارېوەن نەدارۊ دەرمان
ئەر دەوام کەرۊ سەد هەزار لوقمان

١٩٩
ئاما بە گوفتار وات ئەی نوور چەشم
گرەوا بە زار بە دیدەی پڕ نەم

٢٠٠
بەشق خوداوەند واچە پېم تەمام
کۍ سەندن بەی تەور وەنەت عەقڵ و فام