١٥٤
سەفاسەف جەمبین پەریێ تەماشا
زلزلە و زاری یاوا بە سەما

١٥٥
بزورگان تەمام چەنی غوڵامان
دەستکەردن وە شین ئەمان ئەی ئەمان

١٥٦
پادشا تاجەش هەوا دا نە سەر
وېش کېشا نە گل چەنی خاکستەر

١٥٧
مەوات ئەی فەرزەند نوور چەمانم
قووەتی زانوو و تېغ زووانم

١٥٨
ئه‌سپەری عەدوو هەم دوشمەنانم
نېشات ئەفرۊزی دەور جەهانم

١٥٩
هەرچەند ئەساسم نە ڕووی دونیاوە
نە بۊنەی تۊوەن مدران بە پاوە

١٦٠
یە چه‌ خەیرت بۍ نوور دیدەی دین
چه‌ فاسېد چەشمێ وەنەت بی قەرین

١٦١
نەوجوان بەنگین وېش کەرد قەڵاخی
قەڵاخ چە قەڵاخ سیاهـ قەڵاخی

١٦٢
تېغی زەهراڵوود گرتەبۍ بدەست
ئېدعاش ئېد بۍ وېش بکەرۊ قەست

١٦٣
چەند جە هامسەران گرتشان بەنگین
سەندن جە دەستش ئەڵماس ڕەنگین

١٦٤
نمەز چېش واچوو نمەبۊ تەمام
شەرح ماتەمی ئەمیری ئەنام

١٦٥
سێ شەب و سێ ڕووز زاری بۍ نە كۊش
بەعدەز ڕۊی سێهەم میر ئاما بە هۊش

١٦٦
چوون ئاما بە هۊش ئەمیری ئەنام
شا بەردش سجدەی حەیۍ لایەنام

١٦٧
چەند جە حەیوانات بزینە و ئەغنام
کەردن تەسەدۊق ئەمیری ئەنام

١٦٨
بەندیان جە بەند گردین بین ڕەها
کەردشان دۊعا پەرێ پوور شا

١٦٩
چەند هەزار موحتاج دەریووزان دەر
مونعېم بین تەمام جە گەنج و گەوهەر

١٧٠
شوکرانە گۊیان تەمام بزورگان
ساکن بین مەردم جە شۊر و فوغان

١٧١
بەڵۍ شای ئەمیر سەرسام سام بۍ
سەد جا موبتەڵا و گیر وە دام بۍ

١٧٢
نە ئارامش بۍ نە سەبر و نە خواب
نە بەد مەزانا نە خەیر و سەواب

١٧٣
دایم نە سۊدای خواب دووشین بۍ
جە جورعەی مەستی مودام نووشین بۍ

١٧٤
ڕاستشان واتەن یاران دوڵدار
گرفتار عەشق هیچ نەدارۊ چار

١٧٥
هەر کەس گرفتار عەشق یاره‌نان
دل پوڕ پەژاره‌ و ئەندووه بارنان

١٧٦
هەر کەس نە جایێ دڵ گرفتارەن
ڕەنگ زەرد و زەعېف هەر لېو و بارەن

١٧٧
تەڵەبکەرد پاشا ئەعیانان تەمام
جە خۊرد و بزۊرگ جە ئەهل سەلام

١٧٨
دەعوەت کەردشان پەی ئەکل تەعام
جۊق جۊق و سەف سەف تەرتیب دا و کام

١٧٩
چەند هەزار خوانان نەعمەت ئەلوان
پوڕ جە مشک بید مورغان بریان

١٨٠
واردشان تەمام جە سەر تا و پا
دوعاشان وانا ئەعلا تا ئەدنا

١٨١
مەردومان لوان ئەعیانان جا مەند
واردشان قەهوە و شەکەراب قەند