١٢٦
دۊهۊڵ-ژەندەکان جە قاپی شاهی
ژەندشان نۊبەت شاهی موباهی

١٢٧
کەبکان کۊسار قەهقەشان جەمکەرد
پەروانان جە خەوف سوپای سەیل ڕەمکەرد

١٢٨
هۊشیار بین جە خاو مۊرغان و ماهی
خورووس بەناکەرد عه‌لی‌ئه‌ڵلاهی

١٢٩
بېدار بی جە خاو ئەمیری دڵجۊ
ئەندووهـ‌ بارش بۍ، کۊ بە کۊ کۊ کۊ

١٣٠
ئاوازکەرد بەنگین ئەو و نیم نەفەس
بە وېنەی مورغێ نە دام و قەفەس

١٣١
ئافتاب و لەگان حازرکەرد جە لام
ئەدا کەروون فەرز حەیۍ لایەنام

١٣٢
بەنگین چوون ئەژنی ئاواز ئەمیر
بەرئاما نە خواب چوون شېران شېر

١٣٣
ئافتاب و لەگان بەرداشت ئاوەرد
یاوا بە خدمەت ئەو شېری نەبەرد

١٣٤
وستش جانماز نە ڕووی قېبلەگاهـ
گرت وە دەست ئافتاب ساختەی تەڵڵا

١٣٥
قەرار دا لەگان ئەو نە ڕووی زەمین
تا ئەمیر ئابدەست بگیرۊ یەقین

١٣٦
ئېحرام زەڕدۊزش ئالوودەی زەڕ
پەیوەست نە زانووی میر خاتر تەڕ

١٣٧
فەوق بېسمېللاهـ‌ ئاوەرد بە زبان
ئابش ڕېزنا بەنگینە هەمان

١٣٨
فیرۊزەی نگین ئەنگوشت دی ئەحمەر
سۊمەدا ونەش ئەخزەری ئەخزەر

١٣٩
ئەمیر وات بەنگین پەڕ مېهر و تەمکین
پەی چېش سورخ بېیەن فیرۊزەی نگین

١٤٠
داش نە ڕووی شۊعاع نەزەرکەرد مەنزوور
دەردەم شۊناساش حەککاکان دەستوور

١٤١
سەجعەی نگینش کنیا بی بزین
خاتوون دنیا فېردەوس بەرین

١٤٢
موزەییەن بە زین بەرکەندەن ئۊستاد
مەم چوون دیش وە چەم دەستکەرد وە فریاد

١٤٣
ئاهێ جە نەهاد بەرئاوەرد وە بەر
مەدهۊش بی مەدهۊش چوون زامان خەتەر

١٤٤
بەنگینە چوون دیش بەی تەور ماجەرا
ئەمیر سەرنگوون نە خاک سیا[١]

١٤٥
واتش مەزانوون یە کار دېوەن
ئەمیر بەی دەستوور حالش پەشېوەن

١٤٦
دەستکەرد وە خواندن ئایات شەریف
ئاوەرد بە زبان جېسمان لەتیف

١٤٧
دۊعای بۍ پایان ئایات کۊبار
هەم زاتولشەفا چەنی هەفت حەسار

١٤٨
پەیاپەی مەوەند دەم مەکەرد نە ڕووش
ئەمیر دەم بە دەم جە هۊش مەشی هۊش

١٤٩
هەرچەند سەعیکەرد پېش ناما شەفا
شەخسێ ڕەوانەکەرد تا دەرگای شا

١٥٠
جە مقەدەمات هەر چی دی وە چەم
عەرزکەرد وە خدمەت پادشای ئەعزەم

١٥١
پادشا شنەفت بەبۍ پا و سەر
بە تاو و تەعجیل بەرئاما بەر

١٥٢
هەرچەند ئەمیران خاسەی شەهریار
سەنجەق-نشینان گوزیدەی نامدار

١٥٣
زەنان کوودەکان قەومان و خوېشان
ڕەعایا و مسکین چەنی دەروېشان