٩٨
هەردەم هەر ساعەت ڕازان مەکەردن
جە گۊشەی لەبان شەربەت مەوەردن

٩٩
ئاخەرەلئەنجام خاتوو زین بوېش
عەرزکەرد و خدمەت ئەمیر دڵرېش

١٠٠
بوېم مەزانوون چەرخ پڕ ستەم
ئاخر مەکەرۊ هەر دوومان جە هەم

١٠١
ئېد خاسەن نگین ڕەدبەدەل کەریم
نەبا جە ناگاه‌ جە یەک بویەریم

١٠٢
هەر دوو نگینان ڕەدبەدەل کەردن
نە جامەی ڕاحەت سەر وە خواب بەردن

١٠٣
بدیه‌ وای چەرخ، جەور ستەمکار
چە قەهرێ دارۊ جە یاران یار

١٠٤
قیامەت ئەوسا مەبۊ ئاشکار
عاشق بۍ مەعشووق بگیرۊ قەرار

١٠٥
ئه‌ی دونیای فانی هەر پاسە کەردەن
مایەش ڕەنج و غەم فەراق و دەردەن

١٠٦
بە ئەمر قودرەت بەنای بان سەر
پەیدا بین دەردەم ئەو دوو کەبووتەر

١٠٧
هۊرداشتن خاتوون هەم وە بۍ ئەندېش
بردن وە ئۊتاق جاگە و ماوای وېش

١٠٨
پاسه‌شان واتن بوزرگان دین
ڕازشان مەندن نە ڕووی سەرزەمین

١٠٩
هەر کەسێ دوو کەس بکەرۊ جە هەم
بېشک یاگەشن ماوای جەهەننەم

١١٠
ئەر کەسێ کەسێ و یەک شاد کەرۊ
جەنەتولماوا پەی وېش مەبەرۊ

١١١
مەبۊ وە هەمراز حووران جەنان
سەر ئازاد مەبۊ بە ئەمر سوبحان

١١٢
بشنەو جە خاتوون وەقتێ سوب سەحەر
جە خواب مەستی سەر ئاوەرد وە بەر

١١٣
هەرچەند نېگە کەرد کەس نەدی وە چەم
دل دا وە تۊڕ دام نە خمخانەی خەم

١١٤
نېگە کەرد نگین شناسا جە دەست
ئاه سەرد کېشا پەیاپەی پەیوەست

١١٥
واتش خودایا گونه‌کار نیم
عاسی شەرمه‌سار دوور جە یار نیم

١١٦
ببەخشی بە حال جەستەی گرانم
تەن سفتەی زۊخال هەم ناتەوانم

١١٧
ئیم شەو چ شەو بۍ من کەرد گرفتار
سۊپەند ئاساییم وست نە کوورەی نار

١١٨
درېغا درېغ ئېم شەو مەمردم
دامان کەفەن وە خاک مەبردم

١١٩
نەوا بەی دەستوور مەحرووم و مەهجوور
دوور جە یاوەر بووم یاوەر دوور جە دوور

١٢٠
ئومېدم ئیدەن حەیی ڕەبانی
فەرد و فریادرەس حەق سوبحانی

١٢١
یا باری هەنی شاد بوون و ئەمیر
بەرداری نە پام ئی بەند و زەنجیر

١٢٢
یا ڕۊحم بستان جە تەن بېقەرار
بېزارم جە گیان مەدەرەم ئازار

١٢٣
بېخود بۍ دەردم، مەدهووش بۍ جە خاک
نەرگسان و ئەسر خوونی کەرد نمناک

١٢٤
بەی دەستوور خاتوون گرفتار غەم
ئەم جار بواچین ئەخبارات مەم

١٢٥
سوپای خاوەری چوون سەردا ئەسەر
داش نە قەلب لەیل شکەست دا لەشکەر