٧٠
سەقف ئەیوانم یاوان بە گەردوون
گرەو بەردەنان نە چەرخ گەردوون

٧١
نمەز نیشانەی یاگەی تۊ چېشەن
ئاواز بکەر بوێن ئەر کەسێ تېشەن

٧٢
واتش نشانەی یاگەی من ئېدەن
ڕووی شانشینش نە بەڕ و بېدەن

٧٣
چەند پەردەی عېسمەت زەربافت ئاڵا
تەمام ساچاغدار عەجایب کاڵا

٧٤
کېشیان وە ڕووش پەی ڕەسم عزەت
په‌ڕ جە کەنیزان گشت ساحب حورمەت

٧٥
نە پېشوازشەن باغێ چوون ئېرەم
خلافش نېیەن بۍ زیاد و کەم

٧٦
سەروان سەرکېشان تەمام بە عیووق
شاخش سەرئاوېز چوون زوڵف مەعشووق

٧٧
سەراوش وېنەی کەوسەر مەمانۊ
نە دەورش دۊڕاج قۊمری مەوانۊ

٧٨
درەخت بېدان چناران ئاڵا
مەنمانان بە عەرش زەڕستوون هالا

٧٩
بوڵبوڵ مەوانۊ نە هەزار دەستان
گۊڵان جەم بەستەن نە سەحن بوستان

٨٠
سەد هەزار مۊرغان نەو باغ بەرین
تەمام هان نە زکر جەهان‌-ئافەرین

٨١
شاخ درەختان ئەنجیر و ئەنار
ئەرمۊت و شېلاف مېوەی خۊشگەوار

٨٢
هەر کەسێ بەو باغ بکەرۊ گوزەر
ڕەوزەی ڕزوانش مەشۊ نە خاتر

٨٣
واتش ئاواز بکەر کەنیزان وېت
ئەگەر ئېد ڕاستەن جواب بدان پېت

٨٤
خاتوون چوون جە مەم شنەفت ئی سوخەن
شەکەرفەشان کەرد جە دۊڕاج دەهەن

٨٥
هەرچەند ئاواز کەرد کەنیزان وېش
کەس ناما وەدەنگ هیچ نەیاوا پېش

٨٦
عەجەب مەند خاتوون سەرسام بی جە سام
عەرزکەرد و خدمەت ئەمیری ئەنام

٨٧
واتش ئاواز بکەر غۊڵامان وېت
بوینوون چ کەس جواب مەدان پېت

٨٨
بەنگینەی دلېر فەرمان به‌ردار بی
تا سۊب پاسەبان هەم عەسەسوار بی

٨٩
ئاواز کەرد بەنگین شای وەفاداران
فەوق نیکنامان نیکنامی یاران

٩٠
جواب دا دەردەم بەنگین پڕ زات
بەڵۍ چېش ماچی سەرم ها نە ڕات

٩١
ئەمیر وات ئەحسەنت یار وەفادار
پەسەندەی شاهان نیکووی نکووکار

٩٢
ئەمرێ وه‌م نېیەن نە جات ساکن بەر
بدارە وە چەم ستارەی سەحەر

٩٣
موقەیەد ببەر تەمام با خەبەر
نەک جە فاسدان بوینم زەرەر

٩٤
جەواب دا بەنگین وېنەی شەکەرگوڵ
جان فەداته‌نمی بە گیان و بە دڵ

٩٥
هەر تا تەن جە تەخت جان گرتەن قەرار
فەرمان به‌ردارم جە لەیل و نەهار

٩٦
ئەم جار بشنەوە جە خاتوون و مەم
دەست کردن باڵین دەم وە بان دەم

٩٧
تېغی زەهرئاڵوود جە نافە بوار
قەرار دا ئەمیر پەی دەفع بەدکار