٤٢
بۊ تا بەرداریش بدەو ئه‌ی جەوان
ببەریش وە لای خاتوون زەمان

٤٣
جوابش داوە واتش ئەی عەزیز
مەر نەشنەفته‌نی جە ئەهل تەمیز

٤٤
جە ئەوەل زەمان نەی چەرخ کەچ-زەن
زەن ئامان پەی مەرد، مەرد نامان پەی زەن

٤٥
قۊنات شەندشان هەر دوو بە فڕین
یاوان بە ئۊتاق ماوای خاتوو زین

٤٦
دیشان ها نە وەرم دوو دیدەی مەستش
نە، نە، دوو نەرگس خۊمار پەیوەستش

٤٧
بۊی عەتر و بخوور مەیۊ نە ماواش
حوبابی وارەن دوو لیمۊی ساواش

٤٨
ئەر زەڕێ نەو بۊی مەقام خاتوون
بەیۊ وە دەماغ مەدهووشان دوون

٤٩
قەسەم بە داوەر سازەندەی سەما
نە گۊڕ و مەزار گشت مەبان ئەحیا

٥٠
بەرئامان بوار ئەو هەر دوو لەتیف
واناشان ئەوەل بِسْمِ اللە شەریف

٥١
بە ناز و ئېعزاز بەرداشتن خاتوون
شەقە دان نە بال و چەرخ گەردوون

٥٢
بە ئەندەک وەقتێ یاونان بەو جا
هام جوفتشان کەرد زۊهرە چەنی ماهـ

٥٣
ئېم جار بشنەوە تۊ جە زین خەبەر
جە خواب مەستی سەر ئاوەرد وە بەر

٥٤
وېش دی نە ئاغووش جەوانێ زەریف
جەوانێ شیرین نازک و لەتیف

٥٥
سەراسیمە بېیە خاتوون جە ئی کار
عەجایب بماند نەی کار و بازار

٥٦
ئاواز دا وە مەم خاتوون دڵبەر
واتش ئەی جەوان جە حاڵ بۍ خەبەر

٥٧
مەر حەدت چېشەن داری سەر جە چەند
ئامای بەی ئۊتاق هیچ نامای نە وەند

٥٨
ئەر ئەمیر دانۊ قەسەم بە دادار
ئەعزای سالمت مەرېزۊ بە دار

٥٩
مەم چوون بېدار بی نەو نەغمەی داوود
نە دەماغش دا بەر ئاما چوون دوود

٦٠
دیش یەک پەریتەن چوون منای بېگەرد
نېشتەن نە پەهلووش تاک و تەنیا و فەرد

٦١
مەم هەم عەجەب ماند جە کار گەردوون
نە گەردش چەرخ کار کون فەیەکوون

٦٢
واتش ئەی نازدار بینایی چه‌مان
فریشتەی شەریف نادرەی دەوران

٦٣
مایەی حەیاتم رووح ڕەوانم
قووەت زەمیر جەسەد و جانم

٦٤
هەنی هەی کەعبەی قیبلەگای دینم
گوشادی خاتر خار خەمینم

٦٥
من نە جاگەی وېم نەشیه‌نم وە بەر
خاس نگاهـ بکەر باوەر وە مە نزەر

٦٦
واتش نیشانەی ئۊتاقت چېشەن
په‌نه‌م واچە ڕاست دل وە ئەندېشەن

٦٧
وات ئۊتاق من دایم پڕ سازەن
پڕ جە باڵەبان، شاهین و بازەن

٦٨
تەوېلە خانان په‌ڕن جە ئەسپان
نەجدی و مه‌نجۊلۍ پۊڵەنگی پۊشان

٦٩
تازی مەرکەبان ڕاوی، شکاری
ڕازیان وە ڕەخت ڕېزەی مرواری