١٥
ئەوسا دۊمای مەدح یەکتای یەگانە
گۊش دەر و دەستان دەور زەمانە

١٦
بەتاڵ نمەبۊ نوېشتەی تەقدیر
تەقدیر علاجش نېیەن بە تەگبیر

١٧
بە ئەمر بېچوون بەنای بانی سەر
پەرواز نە ئاشیان کەرد دوو کەبووتەر

١٨
چەند نە ڕووی سەما پەروازشان کەرد
چەندێ کۊهساران، دجلەشان پەی کەرد

١٩
ئاخر سەرئه‌نجام نە ئەیوان مەم
هەر دوو نە پاسار نشتن خاترجەم

٢٠
دیشان کە شای مەم نشتەن و دەماغ
شوڵەی جەمینش چوون شوڵەی چراغ

٢١
باڵاش چوون عەرعەر ساوای زەڕستوون
گۊناش مەدرۊشیۊ وېنەی لاڵەی کۊن

٢٢
وستەن چەند فەرشان کار خۆراسان
موتەکا و باڵشت نە هەزار ڕەنگان

٢٣
ئەساسێ بەی تەور ڕازان ڕېزیان
فەرشان و هەشت جە لاش بېـزیان

٢٤
غوڵامان جە لاش دەست و بان دەست
ئېقامەت کەردەن جە باڵا و پەست

٢٥
پەڕەندان بەی تەور چوون دیشان و چەم
ئەساسێ بەی تەور نادرەی ڕووی مەم

٢٦
یەکێشان دەردەم ئاما و گوفتار
بدیە چېشش کەرد چەرخ کەچ ڕەفتار

٢٧
واتش ئەی یاوەر ڕووی چەرخ ئەخزەر
وېنەی ئی جەوان په‌ڕ حوسن و دۊڵبەر

٢٨
نەدیەنم و چەم نە ڕووی ڕۊزگار
قەسەم و بېچوون دارای جەهاندار

٢٩
بنازوون بە سونع قادرێ وەههاب
بەی تەور سازنان جە یەک قەترە ئاب

٣٠
وان یەکی هەنی ئاما بە جواب
واتش ئەی یاوەر با چوون پەی سەواب

٣١
نە جزیر و بۆت خاتووزین نامێ
ته‌ڕک و زەرایف شیرین کەلامێ

٣٢
باڵا تووڵ نەی، زەڕستوون خامێ
دوو چەشمان سېیە سېیاهـ بادامێ

٣٣
پەریزادەیێ، پەری مەقامێ
زۊڵەیخاوارێ نە گولئەندامێ

٣٤
شیرین خۊسرەو هۊمەیلا کامێ
لەیلا سفەتێ عەمبەرین جامێ

٣٥
باش نازداران پڕ هۊش فامێ
قەمەرتەلعەتێ ماهی تەمامێ

٣٦
مەریەمە ئاسا بوڵەند ئەندامێ
شەکەرین ڕازێ تاوس خەرامێ

٣٧
دۊخت میر ئاودەل نە پەردەی عېسمەت
باش نازداران تەتاران و بەت

٣٨
هامشیرەی ئەمیر زەیندین موانان
عەجەب مەردېوەن نە دەور جەهان

٣٩
شاهان جە سەوداش ڕەها دان عەنان
جە مەشق مەجنوون جنوون موانان

٤٠
جۊفت ئه‌ی پسەر زینەن بە ئه‌وساف
وەرنە نایابەن جە قاف تا بە قاف

٤١
ئاما بە گۊفتار ئەوەڵ کەبووتەر
وات بە کەبووتەر دووەم ئەی یاوەر