٨٨٢
چوون دیش بەی دەستوور ئەمیر نازدار
نادېم بی جە وېش جە كەردەی ئی كار

٨٨٣
بە تاقی زاناش نېیەن مەجازی
حەقیقی عېشقەن جە كارسازی

٨٨٤
پەشیمانیش بەرد جە دڵ بەرشی دوود
بەعدەز واقېعات پەشیمانی چ سوود

٨٨٥
مدرا زەمانێ بۍ دەنگ و دووان
تا كە خاتوو زین ئاما بە ئەیوان

٨٨٦
بەعدەز ساعەتێ میر زینەدین بە وېش
بشی وە جانب خاتوونی دڵرېش

٨٨٧
ڕووكەرد وە خاتوون نوور دیدەی دین
په‌وسە بۍ قودرەت ڕەب ئه‌لعالەمین

٨٨٨
مەئیۊس مەنیشە دل مەكەر غەمگین
پەوسە بۍ قودرەت ڕەب ئه‌لعالەمین

٨٨٩
ئاما وە جواب خاتوون نە ڕووی قین
تۊ سەڵامەت بی نە ئەی دەھر كین

٨٩٠
ئەمما ئستېدعام ئیدەن كە فەردا
بدەریم مەعزوور بداریم ڕەوا

٨٩١
سەركەشی گڵكۊی ئەمیر بكەروون
ڕەسم تەعزېیەش بە جا باوەروون

٨٩٢
ڕوخسەت دا ئەمیر خاتوون دەر زەمان
بوېش ھۊرېزا ڕەوان بی ڕەوان

٨٩٣
سەحەر ھۊرېزا جەمین وېنەی بەت
كېشا وە سەر دا به‌رقەی ئاخرەت

٨٩٤
چەنی كەنیزان ڕاھی بین وە ھەم
تا یاوان وە جا مەزارگەیی مەم

٨٩٥
ھېمای دوور بۍ دوور كە بانگش ھۊردا
خاک مەزارش گشت كەرد وە سەردا

٨٩٦
خەیلێ گرەوا بە شین و زاری
خەیلێ ئاوازكەرد مەم وە زگاری

٨٩٧
نەدی ڕەنگ و ڕووش نەبۍ نەدایێ
غەیرەز سەنگ و خاک نەشنەفت سەدایێ

٨٩٨
ناڵا بە دەرگای قادر بېچوون
بە سۊز دەروون ناڵا بە گەردوون

٨٩٩
یا ڕەب باجەتی پەیغەمبەرانت
بە ئایەی كەریم ڕای ڕەھبەرانت

٩٠٠
بە ھەر چەند خاسان نە ڕووی جەھانت
بە ئایەی شه‌ریف نە ڕووی قورئانت

٩٠١
دەر لەحزە نەی جا ڕۊحم بستانی
خەلاس بۊن نە جەور ئەی دونیای فانی

٩٠٢
بە ئەمر قودرەت لامەكان ماوا
مەقروون وە ھەدەف ئېجابەت یاوا

٩٠٣
ڕۊحش نە پەڕەی سینە كەرد پەرواز
نە ڕەوزەی ئېرەم جا گرت وە دڵواز

٩٠٤
سوپای مەوت ئاما ڕەونەق ڕووش بەرد
ئەعزاش كەرد وە یەخ یەخبەندان سەرد

٩٠٥
بە قار كۊچش كەرد نە جەور فەڵەک
بی وە ھامنشین حووران و مەلەک

٩٠٦
ڕۊحش كەرد بە فدای جوانێ شیرین
لوا نە دونیا و فارغ بی یەقین

٩٠٧
فەڵەک جەورت كەرد جەور بۍ سامان
سوپه‌ردی وە خاک نۊبەر نەمامان

٩٠٨
چەند ھەزار غەدرت كەردەن جە یاران
ھەنی وەسەن جەوریانەت بۊ وېران

٩٠٩
كەنیزان زانان وە مەوت دوڵبەر
كەردشان بەو ڕووز نه‌یاگەی مەحشەر