٩١٠
گرېوان بە سۊز و زاری بېقەرار
جە ناگاهـ ئەمیر ئاما جە شكار

٩١١
پورسا ئەخبارات ئەی زایەڵەی شین
واتشان تۊ وەش مەوت بی خاتوو زین

٩١٢
ئەمیر چوون شنەفت حەیران بی جە كار
ڕېزا بە چەمدا ئەسرینان ھەزار

٩١٣
نە ڕووی خانەی زین ئاما بە دامان
چەنی بوزۊرگان میران سوپاھان

٩١٤
ھۊرگېرتن پایەی تابووت خاتوون
ئاوەردن بە شار بە دیدەی پەڕ خوون

٩١٥
خولاسە شوستن ئەو نازك بەدەن
لاشەی شیرینش نېیان نە كەفەن

٩١٦
بەردن وە مەقبەر میران سالار
مەدفوونش كەردن جە پەھلوویۍ یار

٩١٧
ھۊرېزان بەیانێ مەخلووقات شار
سەدایێ ئاما نەو ھەر دوو مەزار

٩١٨
بەكر جەو دەمدا ئاما وە گوفتار
جودا وە بۍ یەک نېشان قەرار

٩١٩
ئەمیر چوون شنەفت خرۊشا بە قار
فەرما بدەران ھەر دوو ڕووی مەزار

٩٢٠
بېڵداران دەردەم داشان مەزاران
نگە كەردشان میران سالاران

٩٢١
ھەر كەس نە جای وېش شین نە جامەی خواب
تەبەق تەبەق نوور مەخېزۊ وە تاب

٩٢٢
چوونكە دی بەی تەور غەزەب كەرد ئەمیر
ڕووكەرد وە بەكر مەردوود بۍ پیر

٩٢٣
ھەر دووشان جە دەھر دونیا بەرشېیەن
ھېمای جە بەدی كۊتاھیت نېیەن

٩٢٤
دەست پېكا وە تېغ ئەمیر بۍ درېغ
پېكا وە موھره‌ش تا یاوا وە مېغ

٩٢٥
ڕۊح پەلیدش شی وە جەھەننەم
ئەو خاس فاسدێ جە دونیا بی كەم

٩٢٦
موقەڕەېبانش خەبەردار كەردن
لاشەی ناپاكش وە خاک سوپه‌ردن

٩٢٧
قەترەیێ جە ھوون جېسم بەد مەزھەب
كەفت نه‌ بەین قەبر دوو عالی‌ نەسەب

٩٢٨
جەو دەم ئەسەر دا خارێ نەودیار
بېیەن وە ڕەقیب ئەو ھەر دوو مەزار

٩٢٩
ئیسە مەشھوورەن نە سای چەرخ كین
تەواتر ماچان خاری مەم و زین

٩٣٠
یاران ھۊرگېلان ئامان ئەو دۊما
مەردم ساكن بی جە شۊر و غەوغا

٩٣١
ئین بار بشنەوان یاوەران یار
چوون لوا بەنگین یار وەفادار

٩٣٢
مەند وە یەک قۊناغ بېیاوۊ وە شار
شی نە واقېعە شەھی شەھریار

٩٣٣
شاهـ چوون دیش نە خواب بەنگینە و زار
بېدار بی جە خواب بۍ سەبر و قەرار

٩٣٤
ئاوازكەرد یاران میران سالار
عەجەب خاوێ دیم نەی ھەنگام كار

٩٣٥
سالاران ئامان تەمام نە گوفتار
واتشان خەیر بۊ خەیرییەت ئاسار

٩٣٦
ناگاهـ جە تەقدیر پادشای جەبار
گەردێ نە سەحرا دېیاردا دېیار

٩٣٧
وە دووربین دېیا شا نە ڕووی تەلار
واتش بەنگینەن مەیۊ بېمه‌دار