٨٥٤
ھۊرگېرتن لاشەی ئەمیر ئەمیران
بەردن پەرێ شار كارسازیش كەران

٨٥٥
ئەساس شۊڕش موھەیاكەردن
بە ڕەسم شاھان تەمام ئاوەردن

٨٥٦
شوستن لاشەی پاک كافوور ئەندازش
عەترئامېز كەردن جاگە و جەنازش

٨٥٧
نېیان ئەو كەفەن لاشەش دەر زەمان
وەندشان چەندێ ئایات قورئان

٨٥٨
ھوون سیاوەحش جە نۊ جۊشاوە
ستوون ئەیوان كەیوان كېشاوە

٨٥٩
ناگاهـ پەیدا بی چەندێ جە سوار
پېشان بۍ چەند ڕەخت چەند تاج و تۊمار

٨٦٠
سەقر و باڵەبان، باز و شاھینان
زەڕین قه‌ڵلادە باز و باڵەبان

٨٦١
پیا بین جە زین تەمامی دەردەم
پورسان ئه‌خبارات وه‌رینان مه‌م

٨٦٢
بەنگین نگەكەرد چوون نە ڕاگەی دوور
دەردەم شناساش حەكاكان دەستوور

٨٦٣
جە نۊ زایەڵەی فوغان و زاری
خېزیا جە بەین مەردان كاری

٨٦٤
تەمام ئەھل شار ئامان وە دامان
كەردشان شیوەن و زاری فەراوان

٨٦٥
ئەسر شینگېڕاِن زەمین كەرد قرمز
خوونابە خېزا جە ھەر بووم و مه‌رز

٨٦٦
ئەر بەیانكەروو فېشتەر ئەخبارات
ئاھېر مەگېرۊ تەمام سەر بەسات

٨٦٧
ھۊرگېرتن تابووت شازادەی غەریب
ئەو جا ئاب و گڵ كەردە بېش نەسیب

٨٦٨
بە ڕەسم و ئاداب بە ڕەویەی وېشان
سوپه‌ردن وە خاک خاتر پەرېشان

٨٦٩
یاران ھۊرگېڵان ئامان ئەو دۊما
باز ھەم لاشەی مەم بە جا مەند نە جا

٨٧٠
بشنەو جە بەنگین یاوەران ئین بار
بدیە چېشش كەرد یاری وەفادار

٨٧١
سواران نیلی ئەسپان ھەم نیلی
قۊشان قەڵاخی تەولەھا فیلی

٨٧٢
بەیداقێ جە نیل نیلی كەرد وە پا
گرەو به‌ردەبێ جە نیلی سەما

٨٧٣
نیل جە ھندستان ئاما وە قیمەت
ئەوەند نیلی كەرد بەیداقان بەت

٨٧٤
پایەی قورتاسان جۍ وە تی زەڕدۊز
سیاو كەبوود گرد ماتەمی ئەفرۊز

٨٧٥
ھېمەت خواھېش كەرد ئەعلا تا ئەدنا
تەپڵ شیوەن ژەند ڕاھی بی نە ڕاهـ

٨٧٦
ئەم جار بشنەوه‌ عەجەب داستان
جە ڕووی ڕاستی بكەروو بەیان

٨٧٧
یەک شەو ھەوای تار داج دەیجوور بۍ
ماهـ و ستارە ھەر دوو بۍ نوور بۍ

٨٧٨
سەیلات باران مەڕېزا بە وار
وېنەی سەیل ئەشک عاشقان زار

٨٧٩
میر زیندین ئاما وېش گېرت نه‌ پېوار
دېیا وه‌ جانېب خاتوونی نازدار

٨٨٠
نە پای سوپای سەیل مدران بېقەرار
دەم دەم مەگرەوۊ پەرێ مەم زگار

٨٨١
ناڵەش بەر مەشۊ وە ماهـ و سەیار
گڕەی دەروونش گڕانته‌ر جە نار