٧٧٠
كۍ دېیەن جەی وەر قەدیم ڕۊزگار
بەندی ببەندۊ بە وېنەی پەروار

٧٧١
حاڵا جە تەقسیر گونات وېیەردم
جە مەودای ئەڵماس خەڵاست كەردم

٧٧٢
بەڵۍ ئاگات بۊ جەی دماش وەنە
بە غەیرەز دوو نان مەدەرەش پەنە

٧٧٣
نېعەم وات ئەمیر زیندان بېقەرار
ڕەوان بی لوا بەكر بېمەدار

٧٧٤
مونقەتېع كەردن خۆراک خاتوون
مەم مودەتێ مەند زەبوون بی زەبوون

٧٧٥
ئین بار بە ئەمرێ بەنای بېھتەرین
بواچوون فەردێ جە قەرەتاجدین

٧٧٦
ڕۊیێ نېشتە بۍ میر زینەدین كار
ئاوەردش نە دڵ ئارەزووی شكار

٧٧٧
فەرما تا ئەسپش ئاوەردن دەردەم
ڕەوان بی ئەمیر چەنی خاس و جەم

٧٧٨
سە ڕۊ جە شكار ناما میر زیندین
نگاه‌ كەر وە ئەمر بەنای بېھتەرین

٧٧٩
خاتوون نە ڕووی كۆشک نېشتە بۍ غەمین
ناگاهـ پەیدا بی گەردێ جە زەمین

٧٨٠
دیار دا عەفۆ و چەكۆ با بەنگین
ئەسپان مەتازان نە ڕووی سەرزەمین

٧٨١
زین كە واقېف بی جە ئامای یاران
ئاوازكەرد یاران چاپووک سواران

٧٨٢
پەی چېش مەتازید ئەسپان نە ڕووی دوون
ئەمیر نە زیندان زەبوونەن زەبوون

٧٨٣
نامووستان كەم مەردان سەروەر
ھەنی پەی مەردی نەوینان كەمەر

٧٨٤
یە چەندێ وەقتەن چەم نە ڕاتەنان
ڕوۊحش نە قەیران یەوم ئه‌لماتەنان

٧٨٥
دەریغا دەریغ پەی زەلیلی مەم
حەسرەت وا حەسرەت جەی زوڵم و ستەم

٧٨٦
بېداد ھەی بېداد جە ئی بېرایی
ھانا سەد ھانا جەی بېخدایی

٧٨٧
ئاخم پەرێ تۊ بۍ قەوم و بۍ فەرد
داخم پەرێ تۊ دڵ مینای بېگەرد

٧٨٨
شەداد ئەی كارە وە كەس نەكەردەن
بۍ گوناه‌ شایێ یاوۊ وه‌ مه‌رده‌ن

٧٨٩
یاران چوون ئەژنین تەمام خیرە بین
فروود جە ئەسپان نامان وە زەمین

٧٩٠
دەست كېشان وە تېغ ھەر یەک جە لایێ
ھەر یەک بە مەساف چوون ئەژدەھایێ

٧٩١
ئامان وە قاپی ئەمیر بۍ مەدار
واتشان ئەمیر شېیەن وە شكار

٧٩٢
پېچان عەنانان سواران داو
شین وه‌ ڕووی بیروون بە تەعجیل و تاو

٧٩٣
مەگېلان نە ڕووی سەحرا و شتاو
ناگاهـ میر زینەدین دیار دا جە ڕاو

٧٩٤
ئەمیر چوون چەمش گنا وە یاران
لەرزا وېنەی بید چوون بېقەراران

٧٩٥
ڕووكەرد وە بەكر چېشتەن تەدبیر
ئەم جار بە دەست یاران مەدین گیر

٧٩٦
ئاما وە ڕازان بەكر جەو دوما
چارەش ھەر ئېدەن ئېدەنان سەلڵا

٧٩٧
بە پای پیادە سەر لوخت و عوریان
ببەندە شەمشېر چوون گەردەنكەشان