٧٤٢
حجاب كەرد خاتوون دەست نە جاگەی وېش
غوڕا به‌ غوڕان ئه‌میران پېش

٧٤٣
ڕەوانكەرد خاتوون ئەسر مرواری
پەرێ مەم كەردش خەیلێ زگاری

٧٤٤
شی وە ئەندەروون بەستش دەست مەم
وات شه‌ڵلا بۍ تۊ عومرم بېیا كەم

٧٤٥
حوكم حاكمەن ھیچ نەداروو چار
چېش كەروو جە دەست جەفای ڕوزگار

٧٤٦
سپورد وە یاران ئەمیر زیندان
بەردن وە زیندان خاتر پەرېشان

٧٤٧
سەر تا پاش پېچان بەرووق زنجیر
وستن بە زیندان زگار و زویر

٧٤٨
وېنەی خامووشان قرار گرت نە جا
ئېستېدعا كەردش بە دەرگای خودا

٧٤٩
ڕوو كەرد نە باڵا وات ئەی خوداوەند
نەجات دەر جە بەند بەندېیان بەند

٧٥٠
فەریاد ڕەسیدەی گشت بېچارەگان
ڕەها کونه‌نده‌ی یاران جە زیندان

٧٥١
ئەر زەڕێ لوتفت هه‌م هه‌ندەن ئەسەر
بە زوودی نەی قەید نەجاتم بدەر

٧٥٢
ئاواتەوازم بە دین دوڵبەر
ئەر بدېیام ھەنی ڕوخسار یاوەر

٧٥٣
بېزار بیم بېزار جەی زیندەگانی
دوعام قەبووڵ كەر فەرد وە سوبحانی

٧٥٤
بە سۊز دەروون دوعاش كەرد ئەمیر
دوعاش قەبووڵكەرد حەیێ بۍ نەزیر

٧٥٥
ئین بار جە شای مەم نەكەرین گوفتار
تەجدید بە دەروون دەستانی ئەخبار

٧٥٦
ئەمیر چوون وستش نە ڕووی زیندان مەم
نېشت و خاتر شاد دلشاد بی جە غەم

٧٥٧
شەو ئاما خاتوون دەستكەرد بە زاری
زاری چە زاری، زاری زگاری

٧٥٨
ڕووكەرد نە دەرگای حەیی جەبباری
واتش خودایا تۊی سەبەبكاری

٧٥٩
یا ئېم شەو دەردم بكەری كاری
یا مەم جەی زیندان نەجات بداری

٧٦٠
چوونكە دوعاش كەرد بە ئەندووههی دڵ
دوعاش بە ھەدەف یاوا موقابڵ

٧٦١
درۊستكەرد بەعزێ جە تەعام نان
نېعمەت ئەلوان مورغان بریان

٧٦٢
داش وە یەک كەنیز نە ڕای نەھانی
كېیاستش پەرێ یار زیندانی

٧٦٣
تا كە مودەتێ كېیاست وە زیندان
جە كەبک و جە قاز، مورغان بریان

٧٦٤
ڕۊیێ بەكر ئاغا نە ڕاگەی نەھان
ھۊرېزا لوا ڕووكەرد وە زیندان

٧٦٥
دیادیش كە مەم نېشتن و مەسروور
شۊڵەی ڕوخسارش گڕانتەر جە نوور

٧٦٦
ئەمیر زیندان تەڵەبكەرد وە بەر
په‌رسا ئەخبارات وەردەنیش یەكسەر

٧٦٧
ئاما بە جواب ئەمیر زیندان
جە لای خاتوو زین پەرێش مەیۊ نان

٧٦٨
ڕووكەرد وە ئەمیر زیندان نەو زەمان
وات ئەی نابكار مەردوودی نادان

٧٦٩
ئەر ئەمیر دانۊ بەی كار و كەردار
ئەعزای سالېمت مەریزۊ بە دار