٧١٤
ڕەوان بین دەردەم پەی عەزم بیروون
بڎیە چېشش كەرد چەرخ پەڕ فنوون

٧١٥
چەند ڕووزێ گوزەشت نە مابەین كار
جە نۊ سازنان سەحاری و بەدكار

٧١٦
زیندین زیافەت درۊستكەرد پەی میر
دەعوەت كەرد ئەو ڕۊ میر بۍ نەزیر

٧١٧
لوا وە خدمەت ئەمیر چوون شای مەم
نېشتن بەرابەر ھەر دووشان وە ھەم

٧١٨
وەقت شام ئاما سفرە ئاوەردن
ئەلوان تەعامان نۊش جان كەردن

٧١٩
قەلیان (و) قاوە ئاما نە دیوان
عەزم نەردبازی ئاما نە مەیدان

٧٢٠
نەردشان ئاوەرد ئامان بە دڵواز
مەم چەنی زیندین ئۆیین كەردن ساز

٧٢١
مەم وات وە ئەمیر دڵواز بۊ وه‌ ھەم
زیندین وات به‌ڵۍ بۊ وه‌ بان چه‌م

٧٢٢
دوو سێ مەرتەبە كەردشان ئۆیین
میر ئەغڵەبه‌ش كەرد جە ئەمیر زیندین

٧٢٣
بەكر جەو دەم دا فكرێ كەرد نە كار
شی وە ئەندەروون نەكەردش مەدار

٧٢٤
وات بە خاتوو زین نە ڕووی بەھانە
میر فەرمان بەیۊ وە دیوانخانە

٧٢٥
نە ڕووی پەنجەرە مەنزوور بدەرۊ
چەنی مەم دڵواز سەترەنج مەكەرۊ

٧٢٦
دەردەم بەرئاما خاتوون وېنەی ماهـ
نە ڕووی پەنجەرە مەكەردش نگاهـ

٧٢٧
ئەو ڕۊ شای ئەمیر خەیلێ بی غالب
شاه‌ وە یەک ئۆیین ھیچ نەبی تاڵب

٧٢٨
جە ئامای خاتوون واقف نەبی مەم
جە قەفاشۊوە مەنزوور دابۍ چەم

٧٢٩
ڕووكەرد وە بەكر چېش ئامان بە وېم
ئیم ڕۊ ھیچ نەردێ نەمەیۊ پەرێم

٧٣٠
ئاما بە جواب بەكر سەرئەنجام
وات تەبدیل كەران ھەر دووتان مه‌قام

٧٣١
ئېقامەتش كەرد میر زیندین دەردەم
میر وە جای ئەمیر، ئەمیر وە جای مەم

٧٣٢
نېشتن ھەر دووشان بەرابەر نە جا
ئەمیر بوڵەند كەرد دوو چەشم شەھلا

٧٣٣
دیش وە چەم خاتوون نە ڕووی پەنجەرە
ئەرواحش لوا جە تەن یەكسەرە

٧٣٤
چەشمش موعەلەق دەروونش پەڕ ڕەنج
نمەدیش وە چەم خانان شەترەنج

٧٣٥
نمەزاناش داش فەرز وە كۊل كامەن
ڕۊخ (و) شاھ جە كام جاشان مه‌قامەن

٧٣٦
داشان شەترەنج مەشانا یەكسەر
ئەما جە دەروون ھیچ نەبېش خەبەر

٧٣٧
چەند ئۆیین جە بەین ھەر دووشان وېیەرد
ئاخر ئەلئەنجام زیندین گرەو بەرد

٧٣٨
ڕوو كەردش وە مەم ئەمیر وە ڕازی
واتش نەسەندم داو دەستبازی

٧٣٩
ئاما بە جواب ئەمیر غەمبار
حاشاییم نېیەن جە لوای ئی كار

٧٤٠
ھەر ئېدعات ھەن بوازە وە كام
ئېختیارداری باقی وەلسەللام

٧٤١
فەرما وە خاتوون بۊ وە ئەندەروون
دوو دەستش ببەند بەبۍ چەند و چوون