٦٨٦
چەكۆ بە غوڕان ئاما جە دیوان
گرتە بۍ وە دەست تېغ بۍ ئەمان

٦٨٧
ھەر كەسێ عەزمش كوشتەی ئەمیرەن
بەی تېغ ئەڵماس لاشەش ئەسیرەن

٦٨٨
بەنگینە دەردەم ئاھر گڕا لېش
دەستش دا وە تېغ بۍ خەوف و ئەندېش

٦٨٩
ڕووكەرد وە ئەمیر یار وەفادار
قەسەم وە بېچوون پادشای موختار

٦٩٠
ھەر كەس نە جاگەش بەرخېزۊ وە قار
مەپېكوون وە تېغ شە و شەھریار

٦٩١
دەردەم ھۊرگرتن ئەمیر بېقەرار
تا شین وە یانە نەگرتن قەرار

٦٩٢
ئەو شه‌و میر زیندین ھیچ نەكەرد خواب
جە خەوف یاران شیران پەڕتاب

٦٩٣
سەحەر زوو بەكر تەڵەبكەرد ئەمیر
بدیە چېشت كەرد مەردوود بۍ پیر

٦٩٤
تەدبیر بكەرە تا چوون مەبۊ چوون
وەرنە وە تېغێ مەڕېزنووت ھوون

٦٩٥
جە نۊ سازنا فنوون بۍ مەدار
ڕووكەرد وە ئەمیر وات ئەی شەھریار

٦٩٦
تەدبیرش ئېدەن ئاوازكەر یاران
بدەرە وە مەم خاتوون سەر زوبان

٦٩٧
جه‌ڵه‌با‌نه‌ و پووش با دەرماڵانە
بدەرۊ تاجدین پەرێ بەھانە

٦٩٨
ھەر وەقت ڕەوان بی تاجەدین ڕاھی
بكەرە وە مەم ھەرچ وېت خواھی

٦٩٩
قەبووڵكەرد تەدبیر بەكر چوون ئەمیر
تەڵەبكەرد ئامان یاران دوڵگیر

٧٠٠
وات وە تاج‌ئەلدین خاترت بۊ جەم
خاتوو زین بەخشام یەكبارە وە مەم

٧٠١
تاج‌ئەلدین ئەژنی جە ئەمیر كەلام
دامانش بوسا بە سەد ئېحترام

٧٠٢
ڕووكەرد وە تاجدین ئەمیر نامدار
فەردا ڕاھی بەر مەگیره‌ قەرار

٧٠٣
قانوون ئیلات با دەرماڵانە
ھا بەخشام وە تۊ پەی وېت بستانە

٧٠٤
چوون مەم مېھمانەن بمانۊ نەی جا
حازر بۊ جە لام جە گاهـ و بېگاهـ

٧٠٥
تا بە خەیریەت بازگەشت مەبوون
ئەسباب شادی درۊست مەكەروون

٧٠٦
جە نۊ تاج‌ئەلدین ھۊرېزا وە پا
جە ڕووی بەندەگی بوسا دەست شاهـ

٧٠٧
موبارەكبادی خېزا جە مەجلېس
خاترجەم كەردن یاران مونېس

٧٠٨
ساكېن بین ئەو شه‌و بە خاتر گوشاد
غەم و خەیاڵان تەمام دان وە باد

٧٠٩
نەو دەم كە تولووع ڕۊ بی ئاشكار
تاج‌ئەلدین وه‌ ئەسپ تازی بی سوار

٧١٠
عەفۆ با چەكۆ شېران شكار
بەردش چەنی وېش بەنگین نامدار

٧١١
ھېمەتخواییش كەرد جە شاهـ ئەمیر
وات خانەی وېتەن بۍ عوزر و تەقسیر

٧١٢
ھەر چ وېت خواھی فاعېل بە موختار
ھەر چ عەزمتەن باوەرە نە كار

٧١٣
مەم وات ئېحتیاج بەی حەرف نەداروو
گردتان بە زات خودا مەسپاروو