٦٣٠
واتش بواچە بەڵۍ موختەسەر
نە ڕووی ڕاستی بەبۍ دەردیسەر

٦٣١
ئاما وە گوفتار بەكر بېقەرار
وات ئەو ڕۊ ئەمیر بەرشی وە شكار

٦٣٢
بەھانەش سازا مەم گرتش ئارام
ناما وه‌ شكار ئەمیری ئەنام

٦٣٣
وېش وست وە ئازار زویر و ماتەم
پەی ئېد كەرد چەنی زین یاوۊن وە ھەم

٦٣٤
ئەو ڕۊ شای ئەمیر ئاما جە شكار
زین جە پۊشت مەم گرتە بۍ قەرار

٦٣٥
جەو بۊنە جە ئامات نەخېزا وە پا
ھەر دوو حازر بین نە دیوان شاه‌

٦٣٦
وە ئەفسوونگەری ھەر دووشان یەقین
حاڵی كەردشان قەرە تاج‌ئەلدین

٦٣٧
جەو پەی ئاتەش دا یانه‌و دیواخان
تا نەجات یابان نە جاگەی دیوان

٦٣٨
ئەر بە حەرف من نەداری بەقا
یە دەسماڵ زین مەندەبۍ بە جا

٦٣٩
ئەمیر جە بەكر شنەفت ئی خەبەر
دۊشنام دا وەنەش وات ئەی بەدگوھەر

٦٤٠
نایاب بەر نە چەم ڕوو سیای بەدگۊ
مەم جە كۊ بېیەن خاتوو زین جە كۊ

٦٤١
ڕۊیێ سەد دەسمال خاتوون عەزیز
مەدۊ وە خەڵقان و ئەھل كەنیز

٦٤٢
ئەر جاری ھەنی با چی ئەی گوفتار
قەسەم وە بېچوون دارای جەھاندار

٦٤٣
سەزایێت مەدۊن وە سەزای زەحمەت
بواچانەوە تا ڕۊی قیامەت

٦٤٤
بە قار خېزیا بەكری بەدكار
شی وات وە تفڵان پەی فاشی ئی كار

٦٤٥
مەده‌ون پەنەتان چەند خورمای شیرین
واچە مەم دیمان چەنی خاتوو زین

٦٤٦
نە ھەر جا تفڵێ كە مەدا دیار
میاوا وە لاش بەكری بېقەرار

٦٤٧
خورما مەدا پېش تەعلیمش مەكەرد
تا گردین تفڵان جزیر تەمام كەرد

٦٤٨
ڕۊیێ سوار بی ئەمیر پەی شكار
دیش تفڵان ماچان نە كووچە و بازار

٦٤٩
نە سەرای دیوان ئەمیران جەم
مەم و زینمان دېیەنان وە ھەم

٦٥٠
ئەمیر ئېد شنەفت بەر پېچا عەنان
نە ڕەفت ئەو شكار ئاما وە دیوان

٦٥١
تەڵەبكەرد بەكر واتش ئەی مەردوود
ئی كارە جە حەرف تۊ بېیەن مەوجوود

٦٥٢
ئەنجامش یاوان بە خەراب ئی كار
فكرێ لېش كەرە بكەرەش تەیار

٦٥٣
ھەم مەبۊ مەعلووم بداری یەقین
گوفتاران وېت واتەی خاتوو زین

٦٥٤
عەرزكەرد وە خدمەت ئەمیری ئەنام
تەدبیرش ئېدەن بزانە تەمام

٦٥٥
دەعوەت بكەرە یاران چەنی مەم
بەعدەز نان وەردەن نەرد باوەر وە جەم

٦٥٦
نە وەقت ئۆیین گەرمەی نەردبازی
مەبۊ تەسویرێ نە دڵ بسازی

٦٥٧
دوو سێ فەرد واچە وە مەم و یارش
نە ڕووی ئېستېھزا بدۊ ئازارش