٥٤٦
حالا جه‌ ئیشان نەكەرین گوفتار
بدەریم ئەخبار ئەمیری سالار

٥٤٧
چوون شین بەو مەكان شكاری یاران
وەڵا بین نە دەشت تەمام سواران

٥٤٨
عاجز بی ئەمیر ئەو ڕۊ جە شكار
واتش وە بەكر ئەمیر نامدار

٥٤٩
لەزەتێ نەدیم ئېم ڕۊ جەی شكار
غەیرەز عاجزی و ئەندووھی زگار

٥٥٠
بۍ ئەمیر مەم حەرامەن ئەی ڕاو
ئازارشان وەرد سواران داو

٥٥١
ئاما بە جواب بەكر بېقەرار
عەرزكەرد وە خدمەت ئەمیری نامدار

٥٥٢
ئامام وەقت سوبح بە دەروون ئەخبار
مەم ئازار دارەن مەشۊ وە شكار

٥٥٣
جەو درەنگ دا بەند بی زووانم
چەنی تۊ نەبی دەنگ و دووانم

٥٥٤
وەرنە شەھزادەی بە وېنەی ئەمیر
ئازاردار كېنۊ غەریب و زویر

٥٥٥
ئەو چە مناسب بەر شی وە شكار
جە لای بوزورگان ئېد مەنمانۊ عار

٥٥٦
ئەمیر چوون شنەفت ئافەرین وانا
واتش چاوەشان بكەران ھانا

٥٥٧
سواران جەم بان بەتاڵەن شكار
بپېچان عەنان تا مەشین وە شار

٥٥٨
تاجەدین ئاوازكەرد وە بەنگینە
ئەی یار دوڵدار كارێ بوینە

٥٥٩
بە وېم مەزانوون مەم چەنی یاوەر
نە سەرای ئەمیر نیشتەن بۍ خەبەر

٥٦٠
ھیچ فامش نېیەن جە سەودای دڵدار
خەبەردارش كەر وەر جە كار و زار

٥٦١
بەنگین چوون ئەژنی بەرئاما وە تاو
جودا بی جە قەلب سواران داو

٥٦٢
خەیلێ تەئخیر كەرد بە ئەمر قەدیر
داخڵ بی بەنگین واسڵ بی ئەمیر

٥٦٣
ئاما وە سەرا بەنگین وە شتاب
دیش كە سەرمەستن ھەر دووشان نە خواب

٥٦٤
واتش ئەی ئەمیر خوفتەی بۍ خەبەر
بەرخواه‌ كە ئافاق ئاھر گرت نە وەر

٥٦٥
ئەمیر زینەدین یاوا بە حەسار
پېیا بی جە زین ئاما بۍ قەرار

٥٦٦
شین وە یەختەخان تەمام سەمەندان
ژەندن ئۊتراغان باز و باڵەبان

٥٦٧
شاھین و سەقەر كەردن كلاوە
ھا وەقتەن ئەمیر به‌یۊ جە لاوە

٥٦٨
زار زار گرېوا بەنگین بە زەبوون
ئەسرینێ ئاما ڕاست وە ڕووی خاتوون

٥٦٩
جە تاب گەرمی ئەسرینی بەنگین
خاتوون بېدار بی جە خاو شیرین

٥٧٠
ئاوازكەرد وە مەم خاتوون بۍ سامان
ھۊرېزە بدیە چېش پېمان ئامان

٥٧١
چاوش ئەمیر نیشتەن جە لامان
نامووسمان شی تا ئاخر زەمان

٥٧٢
مەم چوون گوشاد كەرد نەرگس شەھلا
دیش كە بەنگینەن ئیستادەن وە پا

٥٧٣
فەڕۊخ ئەمیر جە ئامای ئەو یار
ئاخر سەرئەنجام ئاما نه‌ گوفتار