٤٩٠
ئەمیر لېش بڕیا ئارام و قەرار
سپورد ئەرواحش نە پەی ھېجر یار

٤٩١
سوپاه‌ حەبەش وست نە دوشش بار
ئەندوش بۆڵەند بی چوون بەرزی كۊسار

٤٩٢
خواب و خوراكش نە دڵ كەرد برین
فكر و خەیاڵش سەودای خاتوو زین

٤٩٣
زەوق و شادیش بی ئەو شه‌و ماتەم
قەڵا قەڵاش كەرد سوڵتانان غەم

٤٩٤
خورووس بەرئاوەرد سەوت سوب سەحەر
موئەزېن واناش ئەڵلاھو ئەكبەر

٤٩٥
ڕەوشن بی وە نوور سەحرا و دەشت و دەر
ئەوقات نمازان بەر ئامان وە بەر

٤٩٦
ئەمیر ھۊرېزا دڵ جە غەم پەروەر
ئەدا كەردش فەرز حەیێ تەوانگەر

٤٩٧
ئاتەش دەروون وەنەش دا ئەسەر
ھۊرېزا جە تاب تا ئاما بوەر

٤٩٨
ئەو جا كە واعد پېش دابۍ نشان
شی بە ئەو دیار و ئەندەك زەمان

٤٩٩
خاتوون كەنیزێ دەردەم كەرد ڕەوان
بشۊ بوینە ئەر كەسێ مدران

٥٠٠
بەتاو و تەعجیل جواب باوەر پېم
تا كە دیدارش بوینوون بە وېم

٥٠١
كەنیزەك ئاما بۍ سەبر و ئارام
یاوا بەو جایێ مەواعېد مەقام

٥٠٢
دیش كە جوانێ مدران نە ئەو جا
وېنەی یوسفەن بە حوسن و سیما

٥٠٣
وە بێڕۊح مدران بە بېدەنگ و دوون
چمان وەندە بېن نە چاره‌ش ئەفسوون

٥٠٤
چەشم ئېنتېزار خاتوون گرت نە دەر
تا كە كەی مەدۊ كەنیزەك ئەسەر

٥٠٥
ساعەتێ وېیەرد بېزار بی جە گېیان
نە جواب ئەز ئوو یافت نە نام و نشان

٥٠٦
یەكێ ھەنیش كەرد نە عەقەب ڕەوان
ئەویش نادم بی بۍ نام و نشان

٥٠٧
عەجەب مەند خاتوون جە نامای ئیشان
ئاما وە بیروون خاتر پەرېشان

٥٠٨
دیش كە شای ئەمیر مدران چوون لەولاك
كەنیزان ھەر دوو مەدھۊشەن جە خاك

٥٠٩
ڕوو كەرد وە ئەمیر خاتوون زەمان
وەش ئامای وە بان بینایی چەمان

٥١٠
دېیەنم خاوێ ئەی سالار جەم
مەر جه‌ مەحشەر بیاوین وە ھەم

٥١١
دەر جەواب ئاما ئەمیر دەوران
باش نازداران خاتوون زەمان

٥١٢
ھەر سەرنویشتێ جە زات سوبحان
بنویسۊ مەبۊ بوینوون عەیان

٥١٣
بەڵۍ ئېستېدعام ئېدەن ئەر دانی
نەك ھەم جودا بوین نەی دونیای فانی

٥١٤
خەڵوەت من و تۊ جە سەرای زینەدین
لادێ و ھامدەم وە هه‌م بنیشیم

٥١٥
ئەنگوشت قەبووڵ نېیا وە دیدە
كەی ئارام جان ڕۊح ڕەمیدە

٥١٦
ھەر وەقت فرسەت بۊ منەت باره‌نان
فېشتەر من جە تۊ جویای یاره‌نان

٥١٧
واتش ئەی نازدار ئەی كەمان ئەبرۊ
وادەمان ھەر دوو سەرای زیندین بۊ