٤٦٢
دوو سێ دەقیقە مدرا نه‌ دېیار
مەنزوورش مەكەرد به‌و پەری ڕوخسار

٤٦٣
ئاخر سەرەنجام خاتوونی نازدار
واتش وە ئەمیر غەمزەدەی غەمبار

٤٦٤
ئەر عەزمت وزوون باوەڕ و ئەنجام
ئەر ئاب مەنۊشی بنۊشە وە جام

٤٦٥
دېرەن وەقت دېر ڕاھی بەر نە ڕات
تا من بشۊروون ئی قاب و حاجات

٤٦٦
ئاما بە جواب ئەمیر دوڵجوو
تەشنه‌م نېیەنان سەنده‌نم وزوو

٤٦٧
ئەمما عەرزەیێ داروون ئەر دانی
پەنەت بواچوون نە ڕای نېھانی

٤٦٨
خاتوون وات وە مەم مەر ھۊشت نېیەن
عەجەب ھەی عەجەب من كەی تۊم دېیەن

٤٦٩
ئاما بە جواب ئەمیر دوڵڕېش
ڕاستشان واتەن عاقڵان پېش

٤٧٠
ڕازشان مەقبووڵ ئەو نیكووكاران
زەن و ئەسپ و شېر وەفا نەداران

٤٧١
باز ئاما وە ڕاز خاتوون وە زەروور
من كەی تۊم دېیەن ماچی بەی دەستوور

٤٧٢
ئاما وە سوخەن میری خۆش كەلام
واتش وە خاتوون ئەی ماهۍ تەمام

٤٧٣
ئەو ڕۊم شناسای ئەی نازك بەدەن
نە جزیر ئامای وە شەھر یەمەن

٤٧٤
بە حوكم ئیزەد لامەكان فەرد
نە ئاغووش منت قەراردادە كەرد

٤٧٥
بە خواب ڕاحەت سەر وە ھەم به‌ردیم
سەری ئېتاعەت وە ھەم سپوردیم

٤٧٦
ھەر دوو نشانان بە یەك سپوردیم
ھەردوو جە ناگاه‌ جە ھەم وېیەردیم

٤٧٧
منت وست نە دام ھەم نە كوورەی نار
ئېستە مواچی نەداروون ئەخبار

٤٧٨
خاتوون چوون ئەژنی ئی قەوڵ و گۊفتار
ڕېزا بە چەم دا ئەسرینان ھەزار

٤٧٩
وات بە فەدات بۊ گېیانی شیرینم
دات بە ئاو دا ڕەنجی وەرینم

٤٨٠
نەزانام تۊنی نوور دیدە و گېیان
من جە گوفتەی وېم ھا بیم پەشیمان

٤٨١
ئومید ھەن جە لای زیشەوكەت و شان
مەعزوور بداریم جەی حەرف نادان

٤٨٢
ئاما بە جواب ئەمیر نازدار
حەرف مەعزووریت با بۊ بەركەنار

٤٨٣
نە جایێ خەڵوەت بنیشین وە ھەم
ئاشكار كەرین گردین دەرد و غەم

٤٨٤
ئاما وە گوفتار شای پەری ئەندام
عەرزكەرد وە خدمەت ئەمیری ئەنام

٤٨٥
بەغەیر جە ئۊتاق وېم جاگەیێ كۊ
ھەر وەقتێ بە خێر تەشریفت مەیۊ

٤٨٦
قەدەم ڕەنجان كەر گېیانم بۊ فەدات
وېنەی كەنیزان سەرم ھا نە ڕات

٤٨٧
زەڕینە بازن كېشا نە ڕووی دەست
داش وە دەست مەم نە بەغەل پەیوەست

٤٨٨
ھەر دوو جە مەنزوور سېر بی دیده‌شان
گرتشان جە ھەم نشان پەی نشان

٤٨٩
جودا بین جە ھەم زوھرە و موشتەری
بە ئەمر فەرمان حەیێ داوەری