٤٣٤
گەردەن سوراحی چوون مېنای بێگەرد
دیارەن وە بان چاڵ تینی زەرد

٤٣٥
په‌ڕ جە ماوی خاڵ فیرۊزەی خاڵان
دۊڕەن مەرجانەن دەھان ڕۊمان

٤٣٦
مەمان شەكەرسێب یا لیمۊی كاڵەن
یا خۊ شەممامەی زەرد بېخاڵەن

٤٣٧
وەی وەی جە حەیان خەم وەردەن وە ھەم
بېیه‌ن وە سه‌یوان سینە و خاڵ و مەم

٤٣٨
باڵا چوون نەوتووڵ نەمام عەرعەر
نایابەن جە لاش سەوڵ سنەوبەر

٤٣٩
بەی تەركیب ئەندام شۊخ شەنگەوە
بەی سەرمەستی ناز مەدھۊش ڕەنگەوە

٤٤٠
ئاما وە سەر ئاب خاو خاو خەرامان
چوون وەحشی بېباك ئەو ماه‌ تابان

٤٤١
ئەمیر چوون چەمش گنا بە ئەو نوور
وات سەللێ عەلا جەی ئازادە حوور

٤٤٢
یەكێ بۊ بەی تەور مەحبووب و دوڵبەر
كۍ بۊ چوون خورشید شەوقش دا ئەسەر

٤٤٣
جواب دان دەردەم ھەر دوو بەرادەر
واتن نوور چەم غەمزەدەی غەموەر

٤٤٤
یا كېسرەت غەم فامت كەمكەردن
یا جورعەی نە جام سەرمەستیت وەردن

٤٤٥
یا یانەی دەروون وېت كەردەن وېران
نەشناسی مەگەر دوخت ئەمیران

٤٤٦
ھۊشت جەم كەرە ئەر زەڕەێ پېتەن
مەعلووم بۊ جە لات كە یار وېتەن

٤٤٧
ئەمیر چوون ئەژنی ئی گوفتار و ڕاز
چوون وەحشی مۆرغێ ئاما نە پەرواز

٤٤٨
وات بەرادەران ڕازم مەكەن فاش
ئەر ڕەزا دارۊن من مەشوو وەڕاش

٤٤٩
سەر وە خاك پای سایه‌ش مەوەروون
ئېستدعایم ھەن عەرزش مەكەروون

٤٥٠
ئاما بە جواب عەفۆی بەرادەر
واتش نوور چەم ئەی یار یاوەر

٤٥١
چارسوو مەقامەن ھەر سوویێ گوزەر
پەڕ جە غەممازان ئه‌ی ڕووی دەشت و دەر

٤٥٢
نەك بشی وەڕاش غەممازان كار
جە لای میر زیندین بكەران ئېزھار

٤٥٣
سادقی وە خدمەت پېت مەبۊ تەباه‌
مەشۊ نە ڕاگەش ساكن بەر نە جا

٤٥٤
ئەمیر وات دونیا یەك فرووكەشەن
دڵوازی چەنی ئەمیران وەشەن

٤٥٥
چەكۆ وات عەفۆ چ كارت پېشەن
با بشۊ نە ڕاش كە یار وېشەن

٤٥٦
وېنەی ڕاویان مەكەری تەدبیر
كارت پېش نەبۊ با نەبۊ دڵگیر

٤٥٧
وات ئەی بەرادەر كە یار وېتەن
بشۊ بواچه‌ ھەر سوخەن پېتەن

٤٥٨
ھەر نیازت ھەن بواچە پەرېش
خۊفت ھیچ نەبۊ مەكەرە ئەندېش

٤٥٩
ھۊرېزا وە پا ئەمیر نامدار
ڕووكەرد وە جانب خاتوون نازدار

٤٦٠
یاوا وە خدمەت سەوڵ نازپەروەر
سڵام داوەنەش چوون شەھد و شەكەر

٤٦١
عەلەیك دا جواب خاتوون وە حېجاب
ماندە نەبیش كەرد پەی خەیر و سەواب