٤٠٦
مەئزوون دا ئەمیر خاتوون دڵبەر
مېن بەعد ڕەھا بەر نە ڕووی دەشت و دەر

٤٠٧
ھەر تەعامێ ھەن وېت درۊست بكەر
قەبووڵ نەداروون خەلەل دۊ ئەسەر

٤٠٨
خاتوون وات بەڵۍ میر تەمیزم
جە كەنیزەكان كەمتەر كەنیزم

٤٠٩
بشنەو داستان عەجایب دڵگیر
نېشتە بۍ ئەمیر ماتەم و زویر

٤١٠
ڕووكەرد وە عەفۊ، چەكۊی بەرادەر
ئېم ڕۊ كۊی غەمان وە نەم دان ئەسەر

٤١١
ئەو تەخت و نەردە باوەر بە دڵواز
بشانیم نەردێ نەی چەرخ كەچباز

٤١٢
ئاوەردن نېشتن ھەر سێ بە ڕازی
نیاشان بەنای كار نەردبازی

٤١٣
چەند ئۊین جە بەین ھەر سێشان ویەرد
جە ناگاه‌ بە ئەمر تاك تەنیای فەرد

٤١٤
خاتوون شیرین جەمین بۊ گوڵاب
ئاما چوون خورشید بەسەر چەشمەی ئاب

٤١٥
سەر تا پا لېباس ئاڵای زەڕوەرەق
خورشید جە نوورش ھۊرگېرتەن ڕەونەق

٤١٦
نازك و نازدار پەریزادەیێ
جە نەسڵ پەری پاك ئوفتادەیێ

٤١٧
باڵا بوڵەندێ عەرعەر ئەندامێ
قەمەر ڕوخسارێ، ماھی تەمامێ

٤١٨
دوو چەشمان سېیا عەمبەرین موویێ
لوول وەردە حەیان ئەفعی گیسوویێ

٤١٩
ئافەت دەوران كەمان ئەبروویێ
وەیكەری وەیباز وەی وە ھەر سوویێ

٤٢٠
خوونخوار و بېڕەحم خودا نەترسێ
مەغروور و مەدھۊش ئەحواڵ نەپرسێ

٤٢١
مەكەر پەی قېتاڵ وەرینان مەستێ
تیر غەمزە و ناز دایم نە شەستێ

٤٢٢
سەر تا پا بە نوور قودرەت سرووشته‌ن
باڵا وېنەی حوور باغ وەھەشته‌ن

٤٢٣
شەوقش وېنەی ماه‌ دوو ھەفتەمینەن
ڕەویڵەی ڕه‌مكېش نازداری چینەن

٤٢٤
كورپە حەیی تاران سېیاه‌ سه‌عبانی
كەردن سەراوېز تەخت پېشانی

٤٢٥
جا گرتەن نە پای عەرەقچینەوە
جەواھر نشان بەھای چینەوە

٤٢٦
پەی بېداری زوڵف سېیای چین چینش
پەی پەی مەبۊسان لەعل ماچینش

٤٢٧
ئەبرۊ چوون كەمان گۊرگیر بەھرام
یان بەدر ھلال یەك شەوەی تەمام

٤٢٨
نەققاش قودرەت دوو عەین كەردەن مەشق
بېیەن وە سەرمەشق عاشقان عەشق

٤٢٩
ئاھووی تەتارانی خۊش چەریدە
وەلەدەی جەیران سا پەروەریدە

٤٣٠
دەم دوڕج یاقووت كەیلەن جە گەوھەر
پەروەردەن بە ناز چوون شەھد و شەكەر

٤٣١
دوو دەستەی كەڵاف مېقرازی كەردن
وە بان گۊناش چین چین چین وەردن

٤٣٢
بەو تەور ناكەسه‌ن وەقت عېبادەت
لەعل بەدەخشان مەدۊ بغارەت

٤٣٣
شوعای زنەقدان مەدەرەوشۊ جە دوور
ماچی كۊی بلوور، یا خۊ دەریای نوور