٣٧٨
ئەمیر ھەم جە نۊ تەوازعش كەرد
مۊبەت مۊبەتان جە ڕای حەد ویەرد

٣٧٩
وەقت شام ئاما ئاوەردن تەعام
مورغان بریان ئەنواع تەعام

٣٨٠
بەر و پەشت خوان تەمام زەڕئاڵوود
ئەخزەری و ئەحمەر ئەسپەری و كەبوود

٣٨١
تەعام په‌ڕ ئاڵەت فلفل و بازباز
نېیاشان نە خوان چەنی پېشئەنداز

٣٨٢
بوزورگان یەكسەر واردشان تەعام
جە نوقڵ و نەبات جە مەغز بادام

٣٨٣
ھۊرداشتن سفرە دۊعاشان وانا
نېشتن بە شادی ئەعلا تا ئەدنا

٣٨٤
جە قەھوە و قەلیان ھەر چ بۍ تەمام
واردن بوزورگان جە خاس و عەوام

٣٨٥
موترېبان ئامان ژەندن ساز و ڕوود
سۊچناشان وە شاد چەند مېجمەرەی عوود

٣٨٦
عەیشێ كەرد ئەو شه‌و پەرێ مەم ئەمیر
نمەیۊ شەرحش نە وەسف و تەحریر

٣٨٧
چەند ڕۊ بەی دەستوور عەشرەت بی نە كار
دلېران سەرمەست سەراسیمەوار

٣٨٨
ھەر شه‌و بەی دەستوور عەشرەت نە كار بۍ
تلووع قەمەر وادەی شكار بۍ

٣٨٩
شكار مەكەردن تا وەقت ئێوار
جە كەبك و خەرگووش ماوەردن ھەزار

٣٩٠
بەڵۍ مەم جە فەن شكار دانا بۍ
ھەم چابووك و چوست چوون ئەژدەھا بۍ

٣٩١
ھەر سەیدێ نە جا مەخېزا وە بەر
جە دەست شای مەم نمەشی وە دەر

٣٩٢
ئەمیر جەو دەم دا ڕووكەرد وە تاجدین
عەجەب جەوانێ ئی مەرد پاكدین

٣٩٣
مەسڵه‌حەت ئېدەن ببۊ وە سەرڕاو
لایق بە ئەوه‌ن سەرڕاوی سەرڕاو

٣٩٤
ئەمیر زینەدین خەلعەت دا دەردەم
كەردش وە سەرڕاو خاتر كەردن جەم

٣٩٥
بەڵۍ بەكر ئاغا جە قار تاجدین
دڵ په‌ڕ عەداوەت په‌ڕ جە قار و قین

٣٩٦
دایم خەریك بۍ مەرد نابكار
بەكر و ئەمیر بنمانۊ ئەزرار

٣٩٧
فرسەت مەدۊزا شەوان تا وە ڕۊ
فېتنە پەی ئەمیر ئەبەرپا كەرۊ

٣٩٨
ھەر ڕۊ مەم چەنی ئەمیر پوڕ فام
سەترەنجش مەكەرد دائمه‌لمۆدام

٣٩٩
ئېم جار بشنەوە شەممێ جە خاتوون
پەی دیدەنی مەم دەستكەرد وە ئەفسوون

٤٠٠
ھەر چاشتێ وە ڕووی مەجلېس مەبەردن
په‌ڕ جە سەنگ و ڕیگ ھیچ نمەوەردن

٤٠١
ڕۊیێ میر زیندین واتش ئه‌ی خواھەر
ئانە چ نانەن مەكېیانی بووەر

٤٠٢
په‌ڕ جه‌ سەنگ و ڕیگ وەردەنیش نېیەن
ئەمیرێ چوون مەم مېھمانم بېیەن

٤٠٣
جەواب دا خاتوون بە شەرت و ئەدەب
گوناھېم نېیەن ئەی عالی نەسەب

٤٠٤
كەنیزان تەعام ماوەران بە كار
ئەڵبەت خه‌لەلێ لېش مەبۊ ئېزھار

٤٠٥
نەمەشوون وە ئاب من جە خەوف میر
پەوسە تەعامان بېیەن ناگوزیر