٣٥٠
سێ شەبانە و ڕووز مەجلس بۍ نە كار
ژەندن پەرېشان ساز و مووسیقار

٣٥١
تاجەئه‌لدین سێ شەو نەشی بە دیوان
ھەم عەفو چە كۊ-ی مەرد پەھلەوان

٣٥٢
شەخسێ كېیانا ئەمیر بە دەوان
سێ شەوەن تاجدین ناما ن بە دیوان

٣٥٣
مانېعش چېشەن چېشش دان ئەسەر
بكېیانۊ جواب جە خەیر و جە شەڕ

٣٥٤
جوابدا تاجدین واچە وە ئەمیر
مېھمانم ئامان با نەبۊ دڵگیر

٣٥٥
ئاما ئەو دما فرستادەی ڕاە
عەرزكەرد وە جەناب ئەمیر ھېجا

٣٥٦
میر زیندین جە نۊ كېیانا پېغام
وېش و مېھمانش بېیان وەقت شام

٣٥٧
چوون یاوا بە گۊش ڕېحان ئی خەبەر
دل و دەروونش پېش ئاما وە دەر

٣٥٨
شی وە لای دایە عەجووزەی دەوران
واتش ئەی دایە فكرێ كەر پېمان

٣٥٩
ئېم شۆ میر زیندین تاجدین و مېھمان
دەعوەت كەردەنان پەرێ وەردەی نان

٣٦٠
تاقی مەزانوون ئەمیری گوزین
مەدەرۊ پەنەش ئېم شەو خاتوو زین

٣٦١
پەی من دوود و داغ مەمانۊ وە جا
ئەگەر عومرم بۊ نەی زێد و ماوا

٣٦٢
بۊ تا ئە من و تۊ پەیوەندێ كەریم
كارێ و تەدبیر پەسەندێ كەریم

٣٦٣
وات دایە فەرزەند یە چە فۊغانەن
بە دەستم ئی كار خەیلێ ئاسانەن

٣٦٤
دام و تەزویرێ بكەرۊن ئەو پا
ھەر دووشان جە ھەم بكەروون جودا

٣٦٥
دەردەم ھۊرېزا ئەو زال وەرین
لوا وە یانەی قەرە تاج ئه‌لدین

٣٦٦
نگه‌که‌رد جە دوور قه‌ره‌ تاج ئه‌لدین
چه‌نی مەم وە پا ئیستادەن قەرین

٣٦٧
لادۍ شی وەلاش دەروون په‌ڕ جە غەم
عەرزكەردش وە مەم ڕازان دژەم

٣٦٨
واتش ئەی فەرزەند نوور دیدەی دین
ئەر شیت بە دیوان ئەمیر زینەدین

٣٦٩
بە وېم مەزانوون تاقی خواھەره‌ش
مەدەرۊ پەنەت مەشۊ نە وەرش

٣٧٠
خواھەرێ دارۊ نە مەتبەخ كەفتەن
گڕس و گەندیدە ھەم لار و چه‌فته‌ن

٣٧١
بەناشه‌ن بە مەكر بە فەن و فنوون
جوانێ چوون تۊ كەرۊ سەرنگوون

٣٧٢
جە ڕاگەی سەواب من واتم پەرېت
باقی ئېختیار بە وېتەن بە وېت

٣٧٣
ئەمیر چوون شنەفت قەوڵ زاڵ پیر
دڵ پەرێ دڵدار بەندكەرد بە زەنجیر

٣٧٤
وەقت شام یاوا وارد بین وە ھەم
یاوان ئەو سەرای ئەمیران جەم

٣٧٥
بە ڕەسم و ئاداب شەرت ئەدەب كەرد
مەشرووت زیندین میر بە جا ئاوەرد

٣٧٦
زیندین ھەم بوسا ھەر دوو گۊنای مەم
نېشاند جە پەھلووش نېشتن چەنی ھەم

٣٧٧
واتش وەش ئامای ھەزار بار وە خەیر
قودوومت ئاوەرد بەی مەكان و دەیر