٢٩٤
جوفتیار واتش مودەعای کۆته‌ن
ئی جوفتە جوفت جزیر و بۆته‌ن

٢٩٥
خاسەی خاتوو زین ھەمشیرەی ئەمیر
باش نازداران شۊخ بۍ نەزیر

٢٩٦
واتش ڕاست واچە بە عەشق داوەر
جە ڕووی ڕاستی ئېختلات مەكەر

٢٩٧
قەسەم ئەو یادكەرد جوفتیار فەقیر
یارای ئېختلات نەداروون ئەمیر

٢٩٨
دەردەم گېڵاوە بەنگین بازنە ڕاهـ
ئاما بە خدمەت ئەمیر ھېجاهـ

٢٩٩
واتش مزگانی ئەی شاهـ عادڵ
مراد خەیرت جە سەر بی حاسڵ

٣٠٠
جوفـت بۆتنان بزانە یەقین
بمەرد جوفتیار ھەزار ئافەرین

٣٠١
ئەمیر ئېد ئەژنی خەیلێ بی وەشحاڵ
شوكرش كەرد بە زات بەنای بۍ زەواڵ

٣٠٢
سوار بی دەردەم ئەمیر نامدار
ڕووكەرد ئەو جانب جوفتیار ھەژار

٣٠٣
دووبارە ئەمیر پورسا ئەخبارات
وات جوفت زینەن ئەی شیر پوڕ زات

٣٠٤
ئەمیر وات بەنگین شۊخ دوڵاوەر
بەرئاوەر نە جیب دوو سێ چەنگە زەڕ

٣٠٥
بكەر وە نسار مەرد ڕیش سفید
چوونكە بەی تەورە دادمان نەوید

٣٠٦
بەرئاوەرد سێ چنگ جە زەڕ و جە سیم
كەردش ئەو نسار جوفتیار قەدیم

٣٠٧
جوفتیار چوون دیش دوعای خێر وانا
حەمد خوداوەند مەجید كېیانا

٣٠٨
ئەمیر وات ئەی پیر دوورینەی دەوران
حەرفێ مواچوون ڕاست واچە عەیان

٣٠٩
ئەرمن داخڵ بوون و شەھر بۆتان
جە كامین یانە ببۊ نان مېھمان

٣١٠
ئاما بـجواب ئەو پـیر كامڵ
واتش ئەی جەوان فەرزانە و عاقڵ

٣١١
ئەر خواھش داری كارت بۊ مەیسەر
جە خانەی بەكر پا فروود ئاوەر

٣١٢
مەرد ھۊشیار ساحب زوبانەن
ھەر كاروبارێ جە لاش ئاسانەن

٣١٣
ئەر پوشت و قووەت ماچی تاجدینەن
داماد ئەحباب ئەمیر زیندینەن

٣١٤
ئەمیر چوون جە پیر شنەفت ئی خەبەر
چەنی بەنگینە ڕاكەش گرت نە وەر

٣١٥
فەرسەخێ ئەسپان ڕانان و زەروور
شەھر بۆتـیان دیاردا جە دوور

٣١٦
ئەمیر دیادیش شەماڵەی شەبگیر
مەدۊ نە دەماغ گا گا بۊی عەبیر

٣١٧
ڕایحەی وه‌ش بۊی بیلاد یارش
ساوا نە دەماغ بەرشی ئازارش

٣١٨
مەلەک ڕەیحان نام مەكار و عەیار
شوستوشوش مەكەرد جە پائین شار

٣١٩
دوخت بەكر بۍ خەیلێ جادووكار
جه‌وش مەڕانا ئەو نە ڕووی دیوار

٣٢٠
دیش كە دوو سوار چوون بەدر مونیر
پوڕ حوسن و جەماڵ تەمام بۍ نەزیر

٣٢١
چوون دیشان وە چەم جه‌ وېش بی تەباهـ
سەری ڕاشان گرت قەڵاشی دونیا