٢٦٦
بۊ تا بەرگەردیم سوودێ پېت نېیەن
هایم پەی مەقسەد بېجا کۍ شېیەن

٢٦٧
دوو نەفەر سوار چېش مەیۊ جە دەست
مەره‌و پەی ئی کار ماوەری شکەست

٢٦٨
ئاما بجواب ئەمیری ئەنام
واتِش بەنگینەی ساحب عەقڵ و فام

٢٦٩
غەیرەتت ئېدەن جە دەھر دونیا
بەی تەور مەواچی حەرفان بېجا

٢٧٠
قەسەم بە داوەر دارای جەھاندار
بە خەمم و بە پېچ ئەبرووان یار

٢٧١
مەر وەقتێ گېڵوون ئە من جەی مەكان
تەنم بۍ سەر بۊ نەماندە بۊم گېیان

٢٧٢
ئەر تۊش وە لوان زەروورەن كارت
ھۊرگېل ئەو دما خودا بۊ یارت

٢٧٣
بەنگین چوون شنەفت گرېوا بە زار
ڕېزا بە چەمدا ئەسرینان ھەزار

٢٧٤
واتش ئەی ئەمیر ڕۊحم بۊ فدات
ھەر جا مەیل تۊن سەرم ھا نە ڕات

٢٧٥
ھەر تا جەسەدم نە ڕووی بەساتەن
سەرم خاک سۊم جەھان پەیماتەن

٢٧٦
ئېستدعام ئېدەن جە دەرگای داوەر
ببەخشی گونای كەمینەی كەمتەر

٢٧٧
سوار بین و ئەسپ عنان سۊست كەردن
چەندێ بەحر و بەڕ بېدۍ تەیكەردن

٢٧٨
ئێوارە وەقتێ یاوان وە جایێ
وە چەشمەی شیرین سەبزە گیایێ

٢٧٩
گوشنەگی لێشان تەمام دا ئەسەر
گېڵان پەی شكار نە ئەو دەشت و دەر

٢٨٠
ناگاهـ ئاھوویێ ئاما نە گوزەر
ئەمیر جەولان كەرد پەی ئاھووی دۊڵبەر

٢٨١
حەربێ داوەنەش خەڵتان بی نە خاک
سەرش جیاكەرد بە ئەمر بېباک

٢٨٢
ئاوەردن دەردەم كەردن وە كەباب
واردشان كەباب بە بۍ نان و ئاب

٢٨٣
تا سپێدەدەم گرتشان ئارام
سەحەر زوو وە ئەمر بەنای لایەنام

٢٨٤
سواربین دەردەم ڕاناشان ستوور
شەب تا ڕۊ مەشین ھەر دوو بەی دەستوور

٢٨٥
مەنزڵ و مەنزڵ قەتع مەراحل
ئەسپش مەڕانا ئەو شاهـ عادڵ

٢٨٦
مەڕانان وە تاب مدران بە زەروور
ئەمیر دیش وە چەم جوفتارێ جە دوور

٢٨٧
سدای ھۆ بە ھۆی بەربەرش مەیۊ
ئاوازەی دەنگش مەشۊ كۊه‌ بە كۊ

٢٨٨
ئەمیر وات بەنگین وادەی سەڵاتەن
نەمەز ئانە جوفت كامین وەڵاتەن

٢٨٩
بشۊ بزانە ئەحواڵ و خەبەر
باوەرە پەرېم خەبەر سەرانسەر

٢٩٠
جەولان دا وە ئەسپ بەنگین بېقەرار
تا یاوا وە لای ئەو مەرد جوفتار

٢٩١
سڵام كەرد وەنەش عەلەیک دا جواب
ماندە نەبیش كەرد پەی خەیر و سەواب

٢٩٢
پورسا ئەی فەللاح دەور جەھانی
كەنەندەی مەغار غار نەھانی

٢٩٣
ئانە جوفت كۊن بواچە خەبەر
پەی كۍ مەكاڵی تۊ ئی دەشت و دەر