٢٣٨
کەردشان و هەم ئی عەهد و پەیمان
تەمام شین ولای ئەمیر زەمان

٢٣٩
شا بوات په‌نه‌ش فەرزەند ئازاد
مەبەرە غەمگین خاتر بکەر شاد

٢٤٠
سەحەر زوو بە ئەمر بەنای لایەنام
چەند جه‌ سەرهەنگان عالیجا مەقام

٢٤١
چەنی دە هەزار سوارەی نامدار
راهی بان چەنت (چه‌نیت) بشان بەو دیار

٢٤٢
چەند سەندۆق پڕ جە لەعل و مروار
چەند پارچەی عەجیب جە مەتای بۆڵغار

٢٤٣
چەند ئەسپان خاس تازی زەڕنگار
چەندێ جە ئەجناس حەرب جەوهەردار

٢٤٤
چەنێ چەند پێشکەش ساف دڵپەسەند
ببەر پەی ئەمیر مەرد هۆنەرمەند

٢٤٥
ئەوەڵ بە مۆبەت بە مێهرەبانی
دووەم و لەشکەر و جەنگەرانی

٢٤٦
بە هەر نەوع کارت مەبۆ میەسەر
سەرئه‌نجامش دە زوو بەرگەرد و بەر

٢٤٧
ئەمیر چوون شنەفت جە شاهـ ئی خەبەر
زەڕێ هۆش فام بەرئاماش و بەر

٢٤٨
سوپاه‌ حەبەش شۆرئەنگێز نا
و فەوق کافوور عەمبەر^١ رێز نا

٢٤٩
هندی و حەبەشی پۆشان سیا و دێز
شکەست دان کافوور واتن دەست مەرێز

٢٥٠
عەمبەر^٢ رێزیان ئه‌و تاقان و دەر
شین و خواب خۆش عالەم سەرانسەر

٢٥١
سۆپا ئەبیەزی و ئەندەک زەمان
بەرئاما و بەر چوون شێر ژیان

٢٥٢
بە سەد تەمتەراق پەڕەی عەلەم شەند
قەساس دووشین جە شای حەبەش سەند

٢٥٣
ڕۆشنی خێزا نە ڕووی سەربەسات
بێدار بین جە خاو حەیات و مەمات

٢٥٤
چاووشان جاڕدان یانە بە یانە
سواران جەم بین نە هەر تەرانە

٢٥٥
عەلەمدار ئاما و پاش کەرد عەلەم
دە هەزار سوار داشان نە قەڵـەم

٢٥٦
دان نە کۆس حەرب کەڕەنا ژەنیا
لەشکەر جە شەهر یەمەنشار کنیا

٢٥٧
تەمام پێشکەشان ڕاهی بین ڕاهی
نەعرەی ئەسپان نشت نە گاوماهی

٢٥٨
گەرد پای ستوور پۊشا سەرزەمین
خورشید تاریک بی سەما ماتەمین

٢٥٩
ئەو ڕۊ فەترەدان تا وەقت ئێوار
ئێوار نە جایێ گرتشان قەرار

٢٦٠
پاسێ جە شەو شی دە هەزار سوار
هەزیمەت کەردن بە قەتر و بە غار

٢٦١
نە هیچ دېیارێ نەگرتن قەرار
وەقت سوب سەحەر داخل بین وە شار

٢٦٢
تا مەنزل و جای پەنجەمین بەردن
هەر شۆ دە هەزار هەزیمەت کەردن

٢٦٣
خولاسە بە غەیر جە میر و بەنگین
سوارێ نەمەند نە ڕووی خانەی زین

٢٦٤
بەنگین وات وە مەم میر عالی جاهـ
سوار و سوپا تەمام بین تەباهـ

٢٦٥
ئەڵبەت ئی دەغەڵ جە بابۊت بېیەن
وەر نە جە سوپا ئی دەغەڵ نېیەن