په‌ريشانم، په‌ريشانم، وڵم كه‌
دوچار دەرد پنهانم، وڵم‌ كه!

وه ده‌ردم ئاشنا كردی، نه‌كردی
سته‌مگه‌ر فكر ده‌رمانم، وڵم كه!

وڵم كه تانه‌وه‌یت كه‌س په‌ی وه ده‌ردم
دو سێ ڕوژی كه مهمانم، وڵم كه!

نەکرد كه‌س ده‌عوه‌تم خوه‌م بيمه مهمان
وه‌ كار خوه‌م په‌شيمانم، وڵم كه!

حه‌مامه ئی سەرای سه‌رد و گه‌رمه
بساو كيسه‌يی وه‌ ناو شانم، وڵم كه!

ته‌نم زانم نه‌سيب موور و ماره
نه مورم نه (سولەيمانم)، وڵم كه!

نه ساختِ من، وه‌ فولاده نه وه سه‌نگ
هه‌ف هه‌شت ده تيكه سوقانم، وڵم كه!

وه كامِ كه‌س نيه‌گه‌ردد چه‌رخ تا سه‌ر
نه ده‌رويشم نه‌ سوڵتانم، وڵم كه!

وه واويلای دڵ هه‌ر شەو ڕه‌وانه
سرشکِ غه‌م وه دامانم، وڵم كه!

خه‌رابم كرد خه‌رابات خه‌ياڵت
وه ده‌س چوود عه‌قڵ و ئيمانم، وڵم كه!

وه باده‌ی ته‌ڵخ جامِ زنده‌گانی
ده‌می مه‌ست و غه‌‌زه‌ڵ‌خوانم،
وڵم كه!

وه سه‌حرای خەياڵ چون قه‌يس سانی
تو كردی ويل و وەيلانم، وڵم كه!

گوزه‌شت فه‌سڵِ به‌هار و موسمِ باغ
وه فكرِ له‌رزِ زمسانم، وڵم كه!

له‌وه‌ ترسم بكيشد كار وه ها‌وار
نه‌كه‌ی كه‌س گوش وه ئه‌فغانم، وڵم كه!

وڵم كه‌يد يا نيه‌كه‌يد ڕه‌حمی وه حاڵم
ته‌نم كردی وه زندانم، وڵم كه!

وه ئه‌رواح شه‌ره‌ف سەوگەند كه دائم
مه‌لوول مه‌رگ وجدانم، وڵم كه!

شه‌ره‌ف كوشياد و وجدان
جوانه‌مه‌رگ بی
وه بی وجدانی حه‌يرانم، وڵم كه!

وه كام دوشمه‌ن بووه‌م ئەی دووس! شكايه‌ت؟
كه دووس بی قاتڵ گيانم، وڵم كه!

وڵم كه! وڵكه‌رت نيم سوب له مه‌حشه‌ر
تو كردی خار دەورانم، وڵم كه!

تو كردی بی‌سه‌ر و سامان (شامی)
وه مه‌ولا خوه‌م قه‌شه‌نگ زانم، وڵم كه!