ئاڵەکۆک

سافیی ھیرانی add_a_photo
سافی شیعرەکانی سافی
٣٣. جانا لە غەمت والە وو حەیرانە دڵی من
جانا لە غەمت والە وو حەیرانە دڵی من
سەرگەشتە وەکوو وەحشی لە کێوانە دڵی من
دائیم لـە دەر و دەشت و بیابانە دڵی من
موشتاقی ویساڵی ڕوخی جانانە دڵی من

مەعلوومە سیای پەرچەمە وا بەختی سیا کرد
زینناری دوو زولفە کە لە دینی تەوەلا کرد
لۆمەی مەکە گەر ڕوویی لە تاقـی کلیسا کرد
بۆ ڕەسمی وەفا شێوەیی سەنعانە دڵی من

ئاسوودە و فارغ نەبوو ئەسلا لە غەمی تۆ
قەت حەرفی وەفای جارێ نەزانی لە دەمی تۆ
چونکی سەری خۆی ناوەتە ژێری قەدەمی تۆ
بۆیە وەکوو زولفی تۆ پەڕێشانە دڵی من

پەروانە سفەت کەوتووە سووتاوی چراغە
وەک لالە لە عەشقی تۆ دەروونی هەموو داغە
موددێکە لە هیجرانی تۆ بێمار و نەساغە
بۆیە هەموو دەم تالبی لوقمانە دڵی من

بۆ غارەتی مڵکی دڵی عوشاقە دیارە
تابووری غەمی کۆیە زیاتر لە هەزارە
تەسلیمی قەزا لازمە یاران نییە چارە
چونکی لەسەر ئەم جەمعە قوماندانە دڵی من

دڵ کەوتە خەیاڵات لەبەر غونچەیی لێوی
وەک نوقتەیی مەوهوومە ئەگەر بێ نەبزێوی
بەو فکرە لە باغی سەمەن و سونبول و سێوی
وەک بولبولی بێچارە غەزەلخوانە دڵی من

عەبدێکی وەفادار و جەفاکێشە لە هیجران
وا کەوتووە وەک (سافی) لە دەرگانەیی گەیلان
بەم دەردەسەرە کوشتنی لازم نییە قوربان
لەم جەژنەیی قوربانە کە قوربانە دڵی من
دیوانی سافی، چاپی سێیەمین ١٩٧٣ زایینی، چاپخانەی کوردستان هەولێر، لاپەڕە ٣٦و٣٧.
نووسین: کەماڵ ڕەحمانی

پەراوێز edit