ھاتەوە دڵبەرێ بە شەو دزێ بە دوو چرایەوە
شوکری خودا بە ھاتنی قاپی دڵم کرایەوە
بە ڕوویی ئافتابەوە بە چاوی نیمەخابەوە
بە جامی پڕ شەرابەوە ھات و خەوم زڕایەوە
ھات و بە نامی سەرکەشی بە چابوکی و دڵکەشی
غارەتی بەستە تەرکەشی ڕۆحی ڕەوان گەڕایەوە
لە ھاتوچوون و مەتڵەبی، مەپرسە مەیل و مەشڕەبی
مەسیحە دین و مەزھەبی، کیفایەتە بڕایەوە
موژدە درا بە سابیری، تۆ ئەبییە موسافیری
ئەشک و غوباری کافری، لە چاو و دڵ سڕایەوە