تاکەی دڵی سەودازەدە بیماری غەمت بێ
مەحروومی گوڵی باغی جەماڵی ئیرەمت بێ
فەرموو کە خەراجات و خەزێنەی دڵ و جانم
قوربانی سەری ڕێ و نیساری قەدەمت بێ
نوقسان نییە بۆ سەڵتەنەت و شەوکەتی شاھی
دەرحەق بە گەدا مەرحەمەت و یا کەرەمت بێ
ناحەق نییە شەو تا بە سەحەر کافر و موسلیم
دێوانە و پەروانەیی ڕوخساری شەمت بێ
سابیر بەسەر دەرد و غەمی دڵ نایەتە تەحریر
دەریا مەرەکەب، داری جیھان گشت قەڵەمت بێ!